मुंबई : धनंजय मुंडे यांच्या राजीनाम्यावरून आता नवीन वाद निर्माण झाला आहे. अजित पवार यांनी नैतिकतेच्या मुद्यावर तर मुंडे यांनी तब्येतीचे कारण पुढे करत राजीनामा दिल्याचा दावा केला आहे. त्यावरून विरोधक कडाडले आहेत. विष्णू चाटेचा व्हीडीओ कॉल ठेवताच, वाल्मिक कराडने पहिला फोन कुणाला केला.. असा सवाल खासदार सुप्रिया सुळे यांनी केला आहे.
दरम्यान, संतोष देशमुख यांच्या क्रूर हत्येचे फोटो, व्हीडीओ समाज माध्यमांवर येताच एकच खळबळ उडाली. देशमुख यांच्या हत्येच्या ८४ दिवसांनंतर धनंजय मुंडे यांनी त्यांच्या मंत्रिपदाचा राजीनामा दिला. अजित पवार यांनी नैतिकतेच्या मुद्यावर तर मुंडे यांनी तब्येतीचे कारण पुढे करत राजीनामा दिल्याचा दावा केला आहे. त्यावरून विरोधक कडाडले आहेत.
यावेळी सुप्रिया सुळे यांनी धनंजय मुंडे यांच्या राजीनाम्यावरून सरकारला धारेवर धरले आहे. त्यांनी धनंजय मुंडेंचे ट्वीट समोर आणले. भुजबळ, अजित पवार म्हणतात नैतिकतेवर राजीनामा दिलाय. पण धनंजय मुडे यांनी नैतिकताचा ‘न’ देखील वापरला नाही. त्यांनी त्यांचे ट्वीट प्रसार माध्यमांना दाखवले. त्यांनी स्वत:च्या तब्येतीमुळे राजीनामा दिलाय, असे कारण दिले आहे. भुजबळ आणि अजित पवार म्हणतात नैतिकता म्हणून दिलाय. नेमका कशामुळे राजीनामा दिलाय, असा सवाल सुप्रिया सुळे यांनी केला.
हे फोटो भयानक आहेत. आज या गोष्टीला ८४ दिवस झाले. कालपरवा चार्जशीट समोर आली. त्याचे फोटो हे सरकारने पाहिले असतील ना? असा सवाल त्यांनी केला. या व्यक्तीचा राजीनामा घ्यायला ८४ दिवस लागले. सुरेश धस आणि अंजली दमानिया यांची वक्तव्यं पाहिली का? असा सवाल करत त्यांनी सरकारवर टीका केली.
दरम्यान प्रसार माध्यमांशी बोलताना धनंजय मुंडे यांच्यावर खासदार सुप्रिया सुळे यांनी गंभीर आरोप केला. कृष्णा आंधळे गायब होतोच कसा? असा सवाल त्यांनी केला. विष्णू चाटे, सुदर्शन घुले यांनी वाल्मिक कराड याला फोन केले आहेत. त्याचा व्हीडीओ कॉल संपल्याबरोबरच वाल्मिक कराड याने धनंजय मुंडे यांना कॉल केले आहेत. धनंजय मुंडे आणि वाल्मिक कराड हे संपर्कात होते, असा गंभीर आरोप सुप्रिया सुळे यांनी केला.
मला सरकारला विचारायचं आहे तुम्ही म्हणताय नैतिकता म्हणून राजीनामा दिलाय. मात्र ज्याने राजीनामा दिलाय तो म्हणतोय तब्येतीमुळे दिला. सुरेश धस म्हणतात ते बरोबर आहे… धनंजय मुंडे आणि नैतिकता यांची कधी भेट झाली नाही, अशी टीका खासदार सुळे यांनी केली आहे. वाल्मिक कराड ज्या जेलमध्ये आहे, तिथे सीसीटीव्ही नाहीत, याकडे त्यांनी लक्ष वेधले.
