मुंबई : प्रतिनिधी
अनेक धक्के बसत आहेत. मी धक्का पुरुष झालो आहे. कोण किती धक्के देतायेत बघूया, असे आव्हान शिवसेना (ठाकरे गट) पक्षप्रमुख उद्धव ठाकरे यांनी विरोधकांना दिले आहे. तसेच, एप्रिल-मे महिन्यात मुंबई महापालिका निवडणूक लागू शकते, असा अंदाजही उद्धव ठाकरेंनी व्यक्त केला आहे.
विधानसभा निवडणुकीनंतर अनेकांनी ठाकरेंच्या शिवसेनेला ‘जय महाराष्ट्र’ ठोकला आहे. अलीकडेच माजी आमदार राजन साळवी यांनीसुद्धा ठाकरेंची साथ सोडली आहे. त्यापार्श्वभूमीवर उद्धव ठाकरेंनी हे विधान केले असून विरोधकांवर निशाणा साधत चॅलेंज दिले आहे. ‘मातोश्री’ निवासस्थानी शिवसैनिकांना उद्धव ठाकरे बोलत होते.
उद्धव ठाकरे म्हणाले, माझी जपानसारखी परिस्थिती झाली आहे. असे म्हणतात की, जपानमध्ये भूकंपाचा धक्का बसला नाही, तर लोक आश्चर्य व्यक्त करतात. तसे, रोज मला धक्क्यांवर धक्के बसतायेत. मी धक्का पुरुष झालो आहे. आणखी कोण किती धक्के देतायेत बघूया. आपण एकदाच असा धक्का देऊ की पुन्हा हे दिसता कामा नये.
मराठी माणसाच्या मुळावर घाव
ही लढाई एकट्यादुकट्याची नाही. ही सर्वांची लढाई आहे. आपल्याच लाकडाच्या दांड्याची कु-हाड बनवून मराठी माणसाच्या मुळावर घाव घालण्याचा प्रयत्न सुरू आहे. संघटनात्मक बांधणी करण्याचे दिवस आहेत. एप्रिल किंवा मे महिन्यात मुंबई महापालिका निवडणूक लागण्याची शक्यता आहे, असे उद्धव ठाकरे यांनी म्हटले.
