अमरावती : प्रतिनिधी
बहुप्रतीक्षित असलेला अमरावती विमानतळाचा लोकार्पण सोहळा आज झाला. मुख्यमंत्री देवेंद्र फडणवीस व उपमुख्यमंत्री अजित पवार, एकनाथ शिंदे, केंद्रीय उड्डाण मंत्री कीजरापू राम मोहन नायडू यांच्या हस्ते हा लोकार्पण सोहळा पार पडला. आजपासून अमरावती ते मुंबई आणि मुंबई ते अमरावती विमानसेवेला सुरुवात झाली आहे. पहिल्याच दिवशी विमानाचे बुकिंग हाऊसफूल्ल होते.
अमरावती विमानतळासोबतच आशिया खंडातील सर्वांत मोठ्या एअर इंडिया वैमानिक प्रशिक्षण केंद्राचे देखील आज लोकार्पण पार पडले आहे, या विमानतळामुळे अमरावतीच्या विकासाला चालना मिळणार आहे. दरम्यान, ७२ आसनी विमान अमरावती ते मुंबई व मुंबई ते अमरावती असे आठवड्यातून तीन वेळा असेल. सोमवार, बुधवार व शुक्रवार असे तीन दिवस आठवड्यातून विमानसेवा असेल.
१४ वर्षांनंतर आज अखेर अमरावतीकरांचे स्वप्न पूर्ण झाले आहे. मुंबईवरून पहिले विमान अमरावती विमानतळावर सुरक्षित लँड झाले. पहिले विमान लँड झाल्यानंतर अमरावती विमानतळावर मोठा जल्लोष करण्यात आला.
नव्या विकासपर्वाला सुरुवात
मुख्यमंत्री देवेंद्र फडणवीस यांच्या प्रमुख उपस्थितीत अलायन्स एअर कंपनीच्या विमानाचे नवनिर्मित अमरावती विमानतळ येथे आगमन झाले. यावेळी अमरावती विमानतळावर आगमन झालेल्या पहिल्या प्रवासी विमानाला शानदार वॉटर कॅनन सलामी देण्यात आली.
