बीड : प्रतिनिधी
‘आका’चे लोक आजही कार्यरत आहेत. या लोकांनी याआधीही वॉचमनला मारहाण केली म्हणून एवढे सगळे घडले. आजही ‘आका’ची टोळी कार्यरत आहे, असा मोठा गौप्यस्फोट आमदार सुरेश धस यांनी केला. दोन दिवसांपूर्वी मस्साजोग गावातील आवादा कंपनीमध्ये १२ लाख किमतीच्या केबलची चोरी झाल्याचे समोर आले होते. चोरट्यांनी वॉचमनला बांधून ठेवून ही चोरी केली होती. या प्रकरणावरून आता राजकीय वर्तुळात आरोप-प्रत्यारोप सुरू आहेत.
आमदार सुरेश धस यांनी माध्यमांसोबत संवाद साधत असताना मोठा गौप्यस्फोट केला. आमदार धस म्हणाले, या लोकांनी दलित समाजातील वॉचमनला मारहाण केली होती. आताही ‘आका’च्याच कोणत्यातरी सहका-याने हे केले असेल. दोन दिवसांत आरोपी सापडेल, त्यांची टोळी आजही कार्यरत आहे. ‘आका’ने जे लोक जागोजागी ठेवले आहेत ते आजही आहेत. त्यांच्या बदल्या झालेल्या नाहीत, ते त्रासदायक आहेत, असेही धस म्हणाले.
वाल्मिक कराड संदर्भात अजून बरेच काही सापडणार आहे. ईडी चौकशी करणार आहे, ईडीची पूर्वीची नोटीस आहेच त्यामध्ये सगळे काही सापडेल, असेही धस म्हणाले.
‘राख’ उचलण्यासाठी पोलिसांच्या गाड्या
यावेळी धस यांनी पोलिसांवरही आरोप केले. राख उचलण्यासाठी पोलिसांनी त्यांच्या स्वत:च्या गाड्या लावल्या आहेत. कोणाचे टिप्पर, जेसीबी अशी वाहने आहेत, असा आरोप धस यांनी केला.
देशमुख हत्या प्रकरणाची पुढील सुनावणी २४ एप्रिल रोजी
मस्साजोगचे सरपंच संतोष देशमुख हत्या प्रकरणाची आजची सुनावणी संपली असून येत्या २४ तारखेला या प्रकरणी सुनावणी घेण्यात येणार आहे. आजच्या सुनावणीत सरकारी विशेष वकिलांकडून काही कागदपत्रे सादर करण्यात आली. त्यात देशमुखांच्या मारहाणीचा व्हीडीओ कोर्टात दिला आहे. परंतु हा
व्हीडीओ बाहेर प्रसिद्ध होऊ नये, जर झाला तर त्यातून कायदा-सुव्यवस्थेचा प्रश्न निर्माण होऊ शकतो अशी विनंती संतोष देशमुखांच्या बाजूने युक्तिवाद करणारे ज्येष्ठ वकील उज्ज्वल निकम यांनी कोर्टात केली.
कराडची संपत्ती जप्त करण्यासाठी अर्ज
आजच्या सुनावणीबाबत उज्ज्वल निकम यांनी म्हटले की, न्यायालयाने आरोपींना त्यांचे म्हणणे मांडायला सांगितले आहे. येत्या २४ एप्रिलला त्यावर सुनावणी होईल. आजच्या सुनावणीत आरोपी वाल्मिक कराडची चल-अचल संपत्ती जप्त करण्यात यावी असा अर्ज कोर्टात दिला आहे.
