नवी दिल्ली : प्रतिनिधी
भारत आता रशियाकडून कच्चे तेल खरेदी करत नाही, असा दावा अमेरिकेचे राष्ट्राध्यक्ष डोनाल्ड ट्रम्प यांनी केला. पण या वक्तव्यानंतर काही तासांनी भारत सरकारच्या सूत्रांनी असे अजिबात नसल्याचे स्पष्ट केले. भारतीय तेल शुद्धीकरण कंपन्या अजूनही रशियन पुरवठादारांकडून तेल खरेदी करत आहेत. जलद खरेदीचे निर्णय, किंमत, कच्च्या तेलाची गुणवत्ता, साठवणूक, लॉजिस्टिक्स आणि इतर आर्थिक घटकांवर आधारित असतात.
सरकारी सूत्रांनी दिलेल्या माहितीनुसार, भारत अजूनही रशियाकडून तेल खरेदी करत आहे आणि त्यामागे स्पष्ट कारणे आहेत. रशिया हा जगातील दुस-या क्रमांकाचा कच्च्या तेलाचा उत्पादक देश आहे. रशिया दररोज सुमारे ९.५ दशलक्ष बॅरल कच्च्या तेलाचे उत्पादन करतो, जे जगाच्या गरजेच्या सुमारे १०% आहे. इतकंच नव्हे तर रशिया दररोज सुमारे ४५ लाख बॅरल कच्चे तेल आणि २३ लाख बॅरल रिफाइंड तेल विकतो.
मार्च २०२२ मध्ये रशियाचे कच्चे तेल जागतिक बाजारातून बाहेर पडल्यास तेलाच्या पुरवठ्यात मोठा व्यत्यय येऊ शकतो, अशी भीती व्यक्त करण्यात आली होती. याच भीतीपोटी त्यावेळी ब्रेंट कच्च्या तेलाचा भाव प्रति बॅरल १३७ डॉलरवर पोहोचला होता, जो अतिशय जास्त आहे. अशा कठीण परिस्थितीत भारताने समजूतदारपणा दाखवला. भारत हा जगातील तिसरा सर्वात मोठा ऊर्जा वापरणारा देश आहे आणि ८५ टक्के कच्चे तेल परदेशातून खरेदी करतो.
