दौंड : प्रतिनिधी
दौंड येथे कच-याच्या ढिगा-यात अर्भकांचे अवयव सापडल्याने एकच खळबळ उडाली होती. या प्रकरणाचा राज्य महिला आयोगाने तातडीने तपास पूर्ण करण्याच्या सूचना देत वस्तुस्थितीदर्शक अहवाल आयोगास सादर करण्याचे निर्देश पोलिसांना दिले होते. त्यानुसार मानवी अवशेष रुग्णालयाकडे अभ्यासासाठी २०२० पासून आहेत आणि नजरचुकीने कच-यात गेले, अशी प्राथमिक माहिती असल्याचे आयोगाने म्हटले आहे.
पुणे जिल्ह्यातील दौंड शहरात कच-याच्या ढिगा-यामध्ये सहा ते सात अर्भकांचे अवयव आढळून आल्याने एकच खळबळ उडाली आहे. प्लास्टिकच्या बरण्यांमध्ये भरून अर्भक कच-याच्या ढिगा-यामध्ये फेकण्यात आल्याची माहिती समोर आली. या कच-यामध्ये सहा ते सात बरण्यांमध्ये भरून हे अर्भक उघड्यावर फेकल्याचे समोर आले आहे.
कच-याच्या ढिगा-याखाली अशाप्रकारे अर्भक आढळल्याची माहिती मिळताच पोलिस तात्काळ घटनास्थळी दाखल झाले. पोलिसांकडून पंचनामा करण्यात आला असून, याबाबत महिला आयोगाने सोशल मीडियावर पोस्ट लिहून माहिती दिली आहे. हे मानवी अवशेष रुग्णालयाकडे अभ्यासासाठी २०२० पासून आहेत आणि नजरचुकीने कच-यात गेले, अशी प्राथमिक माहिती असल्याचे आयोगाने म्हटले आहे.
राज्य महिला आयोग तातडीने तपास पूर्ण करण्याच्या सूचना देत वस्तुस्थितीदर्शक अहवाल आयोगास सादर करण्याचे निर्देश पोलिसांना दिले आहेत.
दौंड शहरालगत असणा-या बोरावकेनगरमध्ये प्राईम टाऊनच्या पाठीमागे कच-याच्या ढिगा-यात सात ते आठ अर्भकं आणि मानवी शरीराचे काही अवशेष आढळून आले आहेत. यामुळे परिसरामध्ये खळबळ उडाली. प्रथमदर्शनी ही अर्भकं आणि मानवी शरीराचे अवशेष हे प्रयोगशाळेतील नमुने असल्याची माहिती मिळत असली तरी हा गर्भपाताचा प्रकार आहे का? या दृष्टीने देखील पोलिस तपास करत आहेत.
स्थानिक नागरिकांच्या निदर्शनास ही बाब आल्यानंतर त्यांनी पोलिसांना फोन करून या संदर्भातील माहिती दिली. यानंतर तातडीने दौंड पोलिस घटनास्थळी दाखल झाले. अर्भकांचे हे अवयव कोणी टाकले? हा गर्भपाताचा प्रकार आहे का? याचा शोध आता घेतला जात आहे. वैद्यकीय तज्ज्ञांच्या अहवालानुसार यानंतर पोलिस पुढील कारवाई करतील.
सीलबंद बरणीत भरले अवयव
मिळालेल्या माहितीनुसार, ही अर्भकं आणि काही मानवी शरीराचे अवशेष सीलबंद बरणीत भरलेले असून, त्यावर त्या संदर्भातील माहिती देखील आहे आणि ते २०२० मधील आहेत, अशी माहिती आता दिली जात आहे.
