कुपवाडा : जम्मू-काश्मीरच्या कुपवाडामध्ये दहशतवादी आणि सुरक्षा दलांमध्ये चकमक झाल्याचे वृत्त आहे. मिळालेल्या माहितीनुसार, कुपवाडा जिल्ह्यातील कोवुत भागात आज सकाळी सुरक्षा दल आणि दहशतवाद्यांमध्ये झालेल्या चकमकीत एक दहशतवादी मारला गेला. तर लष्कराचा एक जवानही जखमी झाला आहे. सध्या परिसरात सुरक्षा दलांचे ऑपरेशन सुरू आहे. गेल्या दीड महिन्यात खो-यातील विविध भागात सुरक्षा दल आणि दहशतवाद्यांमध्ये दररोज चकमक होत आहे. मात्र, एलओसीसह खो-यात तैनात लष्कर आणि जम्मू-काश्मीर पोलिसांचे जवान दहशतवाद्यांना चोख प्रत्युत्तर देत आहेत.
दरम्यान, मंगळवारीही जम्मू-काश्मीरच्या कुपवाडामध्ये सुरक्षा दल आणि दहशतवाद्यांमध्ये चकमक झाली होती. यानंतर सुरक्षा दलांनी या भागात दहशतवादविरोधी कारवाया सुरू केल्या. दरम्यान, आज पुन्हा एकदा सुरक्षा दल आणि दहशतवादी आमनेसामने आले आहेत. यानंतर लोलाब परिसरात चकमक सुरू झाली. काश्मीर पोलिस विभागाने एक्सवरील पोस्टमध्ये म्हटले आहे की, सुरक्षा दलांना कुपवाडा येथील लोलाब येथील त्रिमुखा टॉपजवळ दहशतवाद्यांच्या उपस्थितीची माहिती मिळाली होती. त्यानंतर शोध मोहीम सुरू करण्यात आली.
लष्कराने घुसखोरीचा प्रयत्न हाणून पाडला
पूंछमध्ये घुसखोरीचा प्रयत्न मंगळवारी उधळला गेला. पाकिस्तानी दहशतवादी अनेकदा खो-यात घुसखोरी करण्याचा प्रयत्न करतात पण सीमेवर तैनात भारतीय जवान त्यांच्या नापाक कारवाया पूर्ण होऊ देत नाहीत. काल म्हणजेच मंगळवारीही दोन दहशतवाद्यांनी पूंछ जिल्ह्यात नियंत्रण रेषेजवळ घुसखोरीचा प्रयत्न केला पण सुरक्षा दलांनी त्यांना हाणून पाडले.
