मुंबई : प्रतिनिधी
विधान परिषदेच्या उपसभापती नीलम गो-हे यांनी नुकत्याच पार पडलेल्या मराठी साहित्य संमेलनात शिवसेना ठाकरे गटाचे प्रमुख उद्धव ठाकरे यांच्याबाबत केलेल्या विधानावरून चांगलाच वाद पेटला आहे. याप्रकरणी आता प्रहार संघटनेचे नेते तथा माजी आमदार बच्चू कडू यांनी नीलम गो-हेंनी त्यांच्या विधानात सत्यता असेल तर उद्धव ठाकरेंवर गुन्हा दाखल करावा, अशी मागणी केली आहे.
विधान परिषदेच्या उपसभापती नीलम गो-हे यांनी नुकत्याच पार पडलेल्या मराठी साहित्य संमेलनात शिवसेना ठाकरे गटाचे प्रमुख उद्धव ठाकरे यांच्याबाबत केलेल्या विधानावरून चांगलाच वाद पेटला आहे. दोन मर्सिडीज मिळाल्या की पदे मिळत, असे विधान त्यांनी केले.
माध्यमांशी संवाद साधताना बच्चू कडू म्हणाले की, नीलम गो-हे यांनी जर उद्धव ठाकरे यांना मर्सिडीज गाड्या दिल्या असतील तर कोणत्या क्रमांकाच्या दिल्या हे त्यांनी सांगितले पाहिजे. खरं म्हणजे आम्हाला नीलम गो-हे यांच्याकडून ही अपेक्षा नाही. त्या उद्धव ठाकरे यांच्याबाबत बोलल्या म्हणून मी बोलत नाही. परंतु कोणत्याही नेत्याने कोणत्याही नेत्यांच्या विरोधात बोलण्याआधी काही संदर्भ किंवा पुरावे दिले पाहिजेत. पण आपण कोणतेही पुरावे न देता बोलत असू तर ते योग्य नाही, अशी भूमिका बच्चू कडू यांनी स्पष्ट केली.
बच्चू कडू म्हणाले की, जर नीलम गो-हे यांनी उद्धव ठाकरे यांना खरंच गाडी दिली असेल तर कोणती गाडी दिली ते त्यांनी सांगावे आणि गुन्हा दाखल करावा. नीलम गो-हे यांच्यात हिंमत असेल तर त्यांनी उद्धव ठाकरेंवर गुन्हा दाखल केला पाहिजे. कारण नीलम गो-हे या उपसभापती आहेत. त्यामुळे त्यांनी असे बिनबुडाचे आरोप करू नयेत. पण उद्धव ठाकरे यांनी खरंच गाड्या घेतल्या असतील तर नीलम गो-हे यांनी रणरागिणीसारखे समोर आले पाहिजे, अशी मागणी बच्चू कडू यांनी केली.
