लातूर : प्रतिनिधी
महाशिवरात्रीचे औचित्य साधून लातूरचे ग्रामदैवत असलेल्या श्री सिद्धेश्वर व रत्नेश्वर देवस्थानच्या वतीने ७२ व्या यात्रा महोत्सवाचे आयोजन करण्यात आले आहे. हा यात्रा महोत्सव २० दिवस चालणार असून या दरम्यान धार्मिक, आरोग्य, सामाजिक यासह विविध उपक्रमांचे आयोजन करण्यात आलेले आहे. मंगळवारी मध्यरात्री म्हणजेच पहाटे १२ वाजता गवळी समाजाच्या वतीने श्री सिद्धेश्वर रत्नेश्वरास दुग्धभाषिके करण्यात येणार असून यानंतर भाविकांंसाठी दर्शन सोहळा सुरु होणार आहे.
महाशिवरात्रीदिनी बुधवारी सकाळी ९.३० वाजता जिल्हाधिकारी वर्षा ठाकूर घुगे यांच्या हस्ते ध्वजारोहण झाल्यानंतर ‘श्री’ ची महापूजा करण्यात येणार आहे. या विविध उपक्रमांनी भाविकांसह यात्रेकरू व शहरातील नागरिकांनी मोठ्या संख्येने सहभागी व्हावे असे आवाहन प्रशासक सचिन जांबूतकर यांच्यासह देवस्थानच्या विश्वस्तांनी केले आहे. महाशिवरात्रीनिमित्त श्री सिद्धेश्वर रत्नेश्वर देवस्थानच्या वतीने ७२ वा यात्रा महोत्सव दि. २६ फेब्रुवारी ते १७ मार्च दरम्यान चालणार आहे. या दरम्यान विविध उपक्रमांचे आयोजन करण्यात आलेले आहे. प्रतिवर्षाप्रमाणे गवळी समाज बांधवांकडून दुग्धाभिषेक करण्यात येणार आहे. तसेच जिल्हाधिकारी यांच्या हस्ते बुधवार दि. २६ फेब्रुवारी रोजी ध्वजारोहण व श्रीची महापूजा करण्यात येणार आहे. याच दिवशी संत सावता माळी भजनी मंडळ व माळी समाज बांधवांच्या वतीने माळीगल्ली येथून मिरवणूक काढण्यात येणार आहे.
विशेष म्हणजे मंगळवारी मध्यरात्री १२ पासूनच देवस्थान व भालचंद्र ब्लड बँक यांच्या वतीने रक्तदान शिबिराचे आयोजन करण्यात आले आहे. याच दिवशी बुधवारी दुपारी १ वाजता गौरीशंकर मंदीर ते सिध्देश्वर मंदीर यादरम्यान पारंपारिक झेंड्यांच्या काठ्यांची झेंडा मिरवणूक काढण्यात येणार आहे. तर याच दिवशी रात्री ८ ते ११ यादरम्यान सूरमनी पंडित बाबूराव बोरगावकर व तालमनी पंडित डॉ. रामभाऊ बोरगावकर यांचे संगीत भजन व ९ ते ११ यादरम्यान हभप ज्ञानोबा माऊली महाराज आष्टेकर यांच्या किर्तनाचे आयोजन करण्यात आले आहे.
गुरुवार दि. २७ फेब्रुवारी रोजी वीरशैव तेली लिंगायत समाज बांधवांच्या वतीने श्रीस गंगेच्या पाण्याचा अभिषेक करण्यात येणार असून याच दिवशी रात्री ९ वाजता हभप जनार्धनदास महाराज वृंदावन यांचे किर्तन होणार आहे. शुक्रवार दि. २८ फेब्रुवारी रोजी हभप भागवताचार्य तुकाराम महाराज मुंडे शास्त्री परडी यांचे किर्तन रात्री ९ वाजता होणार असून शनिवार दि. १ मार्च रोजी हभप भागवताचार्य गणेश महाराज वारंगे, बीड यांचे किर्तन रात्री ९ वाजता पार पडणार आहे. रविवार दि. २ मार्च रोजी हभप संजय महाराज खडक उमरगेकर यांचे तर सोमवारी दि. ३ मार्च रोजी हभप समाधान महाराज उमरगेकर,आळंदी यांचे किर्तन रात्री ९ वाजता होणार आहे. मंगळवार दि. ४ मार्च रोजी देवस्थान परिसरात साई फाऊंडेशनच्या वतीने महाआरोग्य शिबिराचे आयोजन करण्यात आले आहे. याच दिवशी रात्री ९ वाजता हभप गुरुराज महाराज देगलुरकर यांचे किर्तन पार पडणार आहे.
बुधवार दि. ५ मार्च रोजी संगीत भजन होणार असून यामध्ये प्रा. लक्ष्मण श्रीमंगले, प्रा. शिवकुमार उरगुंडे, प्रा. विश्वनाथ स्वामी व तुकाराम आवाड यांचा सहभाग असणार आहे. गुरुवार दि. ६ मार्च रोजी रात्री ८ वाजता कृष्णा हुमनाबादे यांच्यासह दिनेश पोखरकर व सूर्यकांत घोडके यांचे संगीत भजन होणार आहे. शुक्रवार दि. ७ मार्च रोजी पशु प्रदर्शनाचे आयोजन करण्यात आले असून याचा उद्घाटन सोहळा सकाळी ११ वाजता पार पडणार आहे. याच दिवशी रात्री संगीत भजन होणार असून यामध्ये हरिष कुलकर्णी, शिवाजी जाधव व मनोज बारसकर यांचा सहभाग असणार आहे. शनिवार दि. ८ मार्च रोजी सकाळी १०.३० वाजता अश्व व र्श्वान प्रदर्शनाचे आयोजन करण्यात आले असून रात्री ८ वाजता प्रा. ईश्वर घोरपडे यांचे संगीत भजन होणार आहे. रविवार दि. ९ मार्च रोजी सकाळी १० ते सायंकाळी ६ वाजेपर्यंत जिल्हास्तरीय महिला भजन स्पर्धा आयोजित करण्यात आली असून याच दिवशी रात्री दत्ता राजे यांचे संगीत भजन होणार आहे. सोमवार दि. १० मार्च रोजी बीड येथील वेदांत संगीत विद्यालयातील संतोष थोरात व विद्यार्थ्यांच्या वतीने रात्री आठ वाजता संगीत भजन होणार आहे. मंगळवार दि. ११ मार्च रोजी सकाळी ११ ते ४ यादरम्यान १००१ महिलांचा रुद्राभिषेक होणार असून यादरम्यान महिलांसाठी पाककला स्पर्धेचे आयोजन करण्यात आले आहे. याच दिवशी रात्री ८ वाजता सचिन जाधव यांचे संगीत भजन पार पडणार आहे.
बुधवार दि. १२ मार्च रोजी आळंदी येथील भजनसम्राट उद्धवबापू यांचे संगीत भजन होणार असून गुरुवार दि. १३ मार्च रोजी पैठण येथील रामेश्वर महाराज सुपेकर व हभप एकनाथ महाराज यांचे संगीत भजन पार पडणार आहे. शुक्रवार दि. १४ मार्च रोजी लातूर येथील विक्रम कोतवाड यांचे संगीत भजन होणार असून तालमनी गोपाळ जाधव यांचा गजर नामाचा हा मृदंग वादनाचा कार्यक्रम पार पडणार आहे. शनिवार दि. १५मार्च रोजी सायंकाळी ५ ते ७ या दरम्यान १०१ महिलांचे श्रीमती सरोजताई बोधनकर यांच्या उपस्थितीत हरिपाठ वाचन होणार आहे. याच दिवशी रात्री ८ वाजता भुजंग मुर्के यांचे संगीत भजन पार पडणार आहे.
रविवार दि. १६ मार्च रोजी सकाळी १० वाजल्यापासून देवस्थान परिसरात जंगी कुस्तांचा फड रंगणार असून या स्पर्धेतील विजेत्याचा श्री सिध्देश्वर केसरीने सन्मान होवून त्यास चांदीची गदा देण्यात येणार आहे. याच दिवशी रात्री ८ वाजता विठ्ठलराव जगताप, शंकर जगताप,अक्षय चव्हाण व गणेश सुतार यांचे संगीत भजन पार पडणार आहे. सोमवार दि. १७ मार्च रोजी रात्री ८ वाजता लातूर येथील उपविभागीय अधिकारी श्रीमती रोहिणी न-हे-विरोळे यांच्या हस्ते शोभेच्या दारूची आतिषबाजी करून यात्रा महोत्सवाचा समारोप होणार आहे. या विविध उपक्रमांना भाविकांसह यात्रेकरू व शहरातील नागरिकांनी मोठ्या संख्येने उपस्थित रहावे, असे आवाहन प्रशासक सचिन जांबूतकर यांच्यासह विश्वस्तांनी केले आहे.
