शिरूर अनंतपाळ : शकील देशमुख
मान्सूनपुर्व अवकाळी शुक्रवारी पावसाने शिरूर अनंतपाळ शहरासह ग्रामीण भागात अक्षरश: झोडपून काढले. या मुसळधार पावसामुळे नद्या नाल्याला पुर आला तर शहराजवळील घरणी नदीवरील पर्यायी पुल गेला वाहून गेल्याने उदगीर रस्त्यावरील अनेक गावांचा तालुक्याशी संपर्क तुटला असून या मुसळधार पावसाने जनजीवन विस्कळीत झाले आहे.तालुक्यातील शिरूर अनंतपाळ व हिसामाबाद महसुल मंडळात तब्बल ८७.८० मिमी पावसाची नोंद झाली आहे.
शिरूर अनंतपाळ तालुक्यात मागील चार दिवसापासून पावसाची जोरदार बॅटींग सुरु आहे. त्यात गुरुवार व शुक्रवार या सलग दोन दिवस झालेल्या अवकाळी मुसळधार पावसाने शेतजमीन वाहून गेली तर नदी नाले ओसंडून वाहू लागले आहेत. यंदा भर उन्हाळयातच या अवकाळी पावसाने तालुक्यातील पाण्याचे स्रोत प्रवाहित झाल्याने तालुक्यात प्रकल्पातील पाणी साठ्यात वाढ झाली आहे.
दरम्यान शिरूर अनंतपाळ शहराजवळ उदगीर रोडवरील घरणी नदीवरील सध्या पुलाचे काम सुरू आहे. यामुळे वाहतुकीसाठी पाईप वर भराव टाकून पर्यायी पुल तयार करण्यात आला होता. मात्र घरणी प्रकल्प क्षेत्रात मुसळधार पाऊस पडल्याने घरणी नदी ओसंडून वाहू लागली. त्यामुळे पाण्याचा प्रवाह वाढल्याने घरणी नदीवरील पर्यायी पुल वाहून गेला. हा पुल वाहून गेल्यामुळे शुक्रवारी शिरूर अनंतपाळ ते उदगीर हा राज्यमार्ग बंद पडला असल्यामुळे नागरिकांसह वाहनधारकांना अडचणीचा सामना करावा लागत आहे.
तालुक्यात मागील आठ दिवसात तब्बल १८९ मिमी एवढा पाऊस पडला आहे. भर उन्हाळ्यात या अवकाळी मुसळधार पावसामुळे घरणी मध्यम प्रकल्प व तालुक्यातील एकमेव डोंगरगाव बॅरेज मधील पाण्यासाठ्यात वाढ झाली आहे. दरम्यान सार्वजनिक बांधकाम विभागाच्या वतीने घरणी नदीवरील पर्यायी पुलावर भराव टाकणे सुरु असून रात्री हा पुल वाहतुकीस खुला होईल, अशी माहिती संबंधितांनी दिली.
