चाकूर : प्रतिनिधी
चाकूर बसस्थानकातून बाहेर पडल्यानंतर शिवाई बस दुभाजकात अडकल्यानंतर घटनास्थळी जमलेल्या नागरिकांनी आणि प्रवाशांनी धाव घेत बसला ढकलून खड्ड्याबाहेर काढले. ही घटना बुधवारी दुपारी घडली असून राष्ट्रीय महामार्गाच्या कामाच्या दर्जाबरोबरच कंत्राटदाराच्या कार्यक्षमतेवरही प्रश्नचिन्ह उपस्थित झाले आहे.
चाकूर शहरातून जाणा-या राष्ट्रीय महामार्गाच्या कामाच्या संथगतीचा फटका आता थेट वाहतुकीला बसत आहे.राष्ट्रीय महामार्गाच्या दुभाजकाचे गेल्या अनेक महिन्यांपासून काम सुरू आहे. खोदलेल्या भागात माती भरून रस्त्याची लेव्हल करण्यात आली असली तरी संबंधित ठिकाणी मातीची दबई व्यवस्थित झाली नसल्याने बुधवारी बसस्थानकातून बाहेर पडताच शिवाई बस दुभाजकाच्या मध्यभागी अडकल्याने काही काळ वाहतुकीचा खोळंबा झाला. अखेर तेथे उपस्थित नागरिकांनी बसला धक्का देत बाहेर काढले. सार्वजनिक वाहतुकीची बस नागरिकांना ढकलावी लागणे यातून राष्ट्रीय महामार्गाच्या कामाचा निष्काळजीपणा समोर आला.
राष्ट्रीय महामार्गाच्या कामाला अपेक्षित गती नसल्याने शहरातील वाहतुकीचा प्रश्न दिवसेंदिवस गंभीर होत आहे. दुभाजकाचे काम अनेक महिन्यांपासून सुरू असून, कामाच्या ठिकाणी योग्य नियोजन, सुरक्षित वाहतूक व्यवस्था आणि बांधकामातील गुणवत्ता याकडे पुरेसे लक्ष दिले जात नसल्याचा आरोप नागरिकांकडून केला जात आहे. काम नेमके कधी पूर्ण होणार, याचे उत्तर संबंधित यंत्रणा आणि कंत्राटदाराकडून मिळत नसल्याने नागरिकांमध्ये नाराजी आहे. कामाच्या संथगतीमुळे व्यापारी, वाहनधारक, प्रवासी तसेच शहरातील नागरिकांना नाहक त्रास सहन करावा लागत आहे.
कामात वारंवार अडथळे निर्माण होत असतानाही संबंधित कंत्राटदारावर ठोस कारवाई का होत नाही, असा सवाल नागरिक उपस्थित करीत आहेत. राष्ट्रीय महामार्गाचे काम दर्जेदार, सुरक्षित आणि निर्धारित वेळेत पूर्ण करण्यासाठी संबंधित विभागाने तातडीने पाहणी करून आवश्यक कार्यवाही करावी, अशी मागणी होत आहे. रस्ता विकासासाठी असलेले कामच नागरिकांच्या त्रासाचे कारण ठरू लागले असेल तर या कामाच्या गुणवत्तेची आणि विलंबाची जबाबदारी निश्चीत कोणाची? हा प्रश्न सध्या चाकूरवासीयासमोर पडला आहे.
