सोलापूर – गुन्हेगार कितीही चपळ, चलाख असला तरी कायद्याच्या कचाट्यात अडकतोच. क्राईम पेट्रोल सावधान इंडिया सारख्या मालिका पाहून पोलिसांना हुलकावणी देत चोरी करणाऱ्या तिघांच्या सोलापूर पोलिसांनी मुसक्या आवळल्या. मुळचे राजस्थानातील असणाऱ्या या तिघांकडून पोलिसांनी कारसहित ९ लाख ४४ हजार २०२ रुपयांचा मुद्देमाल पोलिसांनी हस्तगत केला आहे. त्यांच्याकडून एकूण ६ गुन्हे उघडकीस आणले आहेत. या संदर्भात अधिक माहिती पोलीस उपायुक्त डॉ.दिपाली काळे यांनी दिली आहे.
राजस्थानातील बिरोल येथील माणकचंद बुधारामजी कुमावत (वय ३५), भुंडाराम ऊर्फ बाबू करणारामजी कुमावत (वय 38) आणि गणपत बगदारामजी कुमावत (वय ४१) या तिघांच्या अंगावर कर्जाचा बोजा होता. त्यामुळे त्यांनी चोरीचा मार्ग पत्करला. हैद्राबाद येथे जावून तिघांनी मोठी चोरी केली. परंतु, हैद्राबाद पोलिसांनी त्यांना पकडले. काही दिवसांनी त्यांना जामीन मिळाला आणि ते बाहेर सुटले.
पहिल्या चोरीच्या गुन्ह्यात पोलिसांची हाती लागल्याने तिघेही चोरटे अधिक सावध झाले. त्यांनी क्राइम पेट्रोल, सावधान इंडियासारखे शो पाहिले. यातून पोलिसांच्या शोधाच्या पद्धती माहिती करून घेतल्या. त्यानुसार चोरीचा प्लॅन बनवला. मालिकेत दाखवल्याप्रमाणे तिघेजण मोबाईल सुद्धा वापरत नव्हते. शहरात प्रवेश करत असताना त्यांनी टोलनाके चुकवले. गुगल मॅपद्वारे कोणत्या शहरात मोठे मार्केट आहे, याचा ते शोध घ्यायचे आणि जवळपासच्या लॉजमध्ये राहत होते. दिवसा ते कोणत्या दुकानात चोरी करायची यासंदर्भात रेकी करायचे आणि मध्यरात्री लोखंडी पार नेऊन शटर उचकटून चोरी करत होते.
तिघा चोरट्यांनी सोलापूर शहरासह चंद्रपूर, लातूर आणि सांगली इथे देखील चोरी केली. चार चाकी गाडी, लोखंडी पार, बॅटरी हे साहित्य घेऊन ते चोरी करत होते. ते मोबाईल वापरत नव्हते. तसेच टोल नाक्यावरही दिसत नव्हते. त्यामुळे पोलिसांच्या कचाट्यात सहजासहजी सापडत नव्हते. सोलापूर शहारत येऊन त्यांनी 17 जानेवारीला सोलापूर कृषी उत्पन्न बाजार समितीतील एक व बाजार समितीतील एक अशी दोन दुकाने फोडले. त्यानंतर सोलापूर पोलीस या चोरट्यांच्या मागावर होते.
सोलापुरातील कर्णिक नगर येथे विना नंबरप्लेटची कार घेऊन तिघेजण थांबल्याची माहिती गुन्हे शाखेचे सहाय्यक पोलीस निरीक्षक संजय क्षीरसागर यांना मिळाली. त्यानंतर त्यांनी सापळा रचून तिघांना पकडले. त्यांच्याकडे कसून चौकशी केल्यानंतर सोलापूर शहरासह चंद्रपूर, लातूर, सांगली या ठिकाणी सुद्धा चोरी केल्याचे उघडकीस आले. चौकशीदरम्यान मालिका पाहून पोलिसांना हुलकावणी देत असल्याचेही त्यांनी सांगितले.
