सॅन्फ्रान्सिस्को : वृत्तसंस्था
जगभरात कोट्यवधी लोक जी-मेलचा वापर करतात. दररोज लाखो-करोडो मेल पाठवले जातात, ज्यात महत्वाची माहिती असते. आता याच जी-मेलवर आतापर्यंतचा सर्वात मोठा सायबर हल्ला झाला आहे. यामुळे २५० कोटी युजर्सची खासगी माहिती लीक झाली आहे. हॅकर्स या माहितीचा गैरवापर करू शकतात. तज्ज्ञांच्या मते, याला गुगल डेटाबेसमधील आतापर्यंतचा सर्वात मोठा डेटा लीक म्हटले जात आहे.
जी-मेलचा डेटाबेस व्यवस्थापित करणारी कंपनी सेल्सफोर्सच्या क्लाउड प्लॅटफॉर्ममध्ये ही डेटा चोरी झाली आहे. या कोट्यवधी युजर्सचा डेटा शायनीहंटर्स नावाच्या हॅकर गटाच्या हातात पोहचला आहे. रिपोर्टनुसार, जून २०२५ मध्ये सेल्सफोर्सच्या क्लाउडमध्ये हा सायबर हल्ला करण्यात आला. हॅकर गटाने सोशल इंजिनिअरिंगचा वापर करुन हा हल्ला केला आहे. गुगलच्या थ्रेट इंटेलिजेंस ग्रुपनुसार, स्कॅमर्सनी आयटी कर्मचा-यांना फोन कॉलद्वारे फसवले.
स्कॅमर्सनी गुगल कर्मचारी असल्याचे भासवून सेल्सफोर्सशी बनावट अ‍ॅप कनेक्ट केले आणि डेटा लीक झाला. या डेटा लीकमुळे, हॅकर्स युजर्सचा संपर्क, व्यवसाय नावे, संबंधित नोट्स इत्यादी मिळवू शकतात. मात्र, गुगलने कोणत्याही युजरचा पासवर्ड लीक झाला नसल्याची पुष्टी केली आहे. मात्र, या हॅकर्सनी अनेक युजर्सच्या डेटाचा गैरवापर करण्यास सुरुवात केली आहे. अनेक ऑनलाइन फोरमवर युजर्सनी फिशिंग ईमेल येत असल्याचा दावे केले आहेत. तसेच, त्यांच्या नंबरवर बनावट कॉल आणि मेसेज पाठवले जात आहेत.
सायबर तज्ञांचे म्हणणे आहे की, या डेटा उल्लंघनाचा युजर्सच्या जीमेल अकाउंटच्या पासवर्डवर थेट परिणाम होणार नाही. मात्र, त्यांची अनेक महत्त्वाची माहिती हॅकर्सच्या हाती आली आहे.
