मुंबई : वृत्तसंस्था
इंडियन प्रीमियर लीग (आयपीएल) २०२५ मध्ये समालोचन करताना माजी भारतीय क्रिकेटपटू हरभजन सिंग वादात सापडला आहे. सनरायझर्स हैदराबाद आणि राजस्थान रॉयल्स यांच्यातील सामन्यादरम्यान हरभजन सिंगने जोफ्रा आर्चरवर वादग्रस्त टिप्पणी केली.
हरभजन सिंगने आर्चरसाठी ‘काळी टॅक्सी’ हा शब्द वापरला. हरभजन सिंगच्या या विधानानंतर सोशल मीडियावर त्याच्यावर टीका करण्यात येत आहे. सदर प्रकारच्या कमेंटमुळे सोशल मीडियावर वाद निर्माण झाला आहे आणि हरभजन सिंगला मोठ्या प्रमाणात ट्रोल केले जात आहे.
सदर घटना सामन्याच्या पहिल्या डावातील १८ व्या षटकात घडली, ज्यामध्ये राजस्थानकडून जोफ्रा आर्चर गोलंदाजी करण्यासाठी आला होता. सनरायझर्स हैदराबादकडून इशान किशन आणि हेनरिक क्लासेन क्रीजवर उपस्थित होते. जोफ्रा आर्चरच्या सलग चेंडूंवर क्लासेनने चौकार मारल्यानंतर हरभजनने ही टिप्पणी केली. सदर व्हिडीओ सध्या सोशल मीडियावर चांगलाच व्हायरल होत आहे.
हरभजन सिंग म्हणाला, लंडनमध्ये काळ्या टॅक्सीचे मीटर वेगाने चालते आणि इथे आर्चर साहेबांचे मीटरही वेगाने चालते. अशा प्रकारच्या टिप्पण्यांमुळे लोक संतप्त झाले आहेत आणि आयपीएल २०२५ च्या समालोचन पॅनेलमधून हरभजन सिंगला तात्काळ काढून टाकण्याची मागणी होऊ लागली आहे. एका व्यक्तीने म्हटले की अशा टिप्पण्या लज्जास्पद आणि घृणास्पद आहेत. हरभजनला ताबडतोब कॉमेंट्री पॅनलमधून काढून टाकावे.
