कोल्हापूर : प्रतिनिधी
कर्नाटकातील चित्रदुर्ग जिल्ह्याजवळ कोल्हापूर अँटी करप्शन ब्युरोमध्ये कार्यरत असलेल्या डीवायएसपी वैष्णवी पाटील यांच्या इनोव्हा कारला भीषण अपघात झाला. या अपघातात त्यांच्या सोबत प्रवास करणा-या दोघा जणांचा जागीच मृत्यू झाला असून डीवायएसपी वैष्णवी पाटील यांच्यासह तिघे जखमी झाले आहेत.
वैष्णवी पाटील यांची प्रकृती सध्या स्थिर असल्याची माहिती आहे. बंगळुरूवरून कोल्हापूरकडे परतताना आज पहाटे हा अपघात झाला. वैष्णवी पाटील ज्या इनोव्हा कारमधून प्रवास करत होत्या, ती कार अचानक एका लॉरीला जाऊन धडकली. धडक इतकी भीषण होती की कारचे मोठे नुकसान झाले आणि त्यामध्ये प्रवास करणा-या दोघांचा घटनास्थळीच मृत्यू झाला.
जखमींना त्वरित चित्रदुर्ग येथील जिल्हा रुग्णालयात हलवण्यात आले. डीवायएसपी वैष्णवी पाटील यांच्यावर तेथे उपचार सुरू असून त्यांची प्रकृती स्थिर असल्याचे डॉक्टरांनी सांगितले आहे. अपघाताचे नेमके कारण अद्याप स्पष्ट झालेले नसले तरी इनोव्हा आणि लॉरीच्या जोरदार धडकेत हा भीषण प्रकार घडल्याची प्राथमिक माहिती आहे. या दुर्घटनेमुळे कोल्हापूर पोलिस दलासह अँटी करप्शन ब्युरो वर्तुळात मोठी खळबळ उडाली आहे.
