धाराशिवला होणार क्षेपणास्त्र, संरक्षण साहित्य निर्मिती प्रकल्प

ग्लोब फोर्ज लिमिटेड पहिल्या टप्प्यात करणार २००० कोटींची गुंतवणूक
धाराशिव : प्रतिनिधी
धाराशिव येथील कौडगाव एमआयडीसीत लवकरच क्षेपणास्त्र आणि संरक्षण साहित्य निर्मिती करणा-या कारखान्याची उभारणी केली जाणार आहे. वर्षभराच्या पाठपुराव्यानंतर ग्लोब फोर्ज लिमिटेड अर्थात पूर्वीची निबे लि. ही नामांकित कंपनी पहिल्या टप्प्यात २००० कोटी रुपयांची गुंतवणूक करणार आहे. या प्रकल्पामुळे जिल्ह्यातील ३००० जणांना रोजगार उपलब्ध होईल, अशी माहिती मित्रचे उपाध्यक्ष, आमदार राणाजगजितसिंह पाटील यांनी शुक्रवारी दिली.

जिल्हाधिकारी कार्यालयातील सभागृहात आयÞोजित पत्रकार परिषदेत आमदार राणाजगजितसिंह पाटील बोलत होते. मुख्यमंत्री देवेंद्र फडणवीस यांचे यासाठी वर्षभरापासून प्रयत्न सुरू होते, असे त्यांनी सांगितले. या प्रकल्पामुळे धाराशिव आता डीफेन्स हब म्हणून उदयास येईल, असा विश्वास त्यांनी व्यक्त केला. कौडगाव एमआयडीसीत दोन प्रकल्पांची उभारणी होणार आहे. पहिल्या १००० एकरांवर संरक्षण दलासाठी आवश्यक टीएनटी आणि प्रपोलेंट तयार केले जातील. नैसर्गिक खतही उपलब्ध होईल. यात तयार होणारा सीबीजी आणि खत कंपनीने जिल्ह्यातच द्यावे, असे ठरले आहे.
मुख्यमंत्री फडणवीस यांच्या उपस्थितीत कंपनीचे प्रमुख गणेश निबे यांच्याशी ८ एप्रिल २०२५ रोजी पहिली भेट झाली होती. त्यांनी एक हजार एकर जागेची अपेक्षा व्यक्त केली होती. कौडगाव, होर्टी, माळुंब्रा, अपसिंगा आदी ठिकाणच्या जागा त्यांना दाखवण्यात आल्या होत्या. त्यांनी कौडगाव एमआयडीसीतील जागेवर शिक्कामोर्तब केले, असे आमदार पाटील यांनी सांगितले,

२००० अभियंते,
१००० कर्मचारी भरती
या प्रकल्पासाठी कंपनी धाराशिव जिल्ह्यात अंदाजे २,००० कोटी रुपयांची गुंतवणूक करणार असून यामुळे सुमारे ३००० लोकांना थेट रोजगार उपलब्ध होणार आहे. यात २००० केमिकल व मेकॅनिकल इंजिनियर आणि १००० इतर कर्मचारी असतील. याशिवाय स्थानिक लघुउद्योग आणि पूरक उद्योगांच्या माध्यमातून मोठ्या प्रमाणावर अप्रत्यक्ष रोजगारही निर्माण होईल. हा प्रकल्प धाराशिव जिल्ह्याला संरक्षण उत्पादनाच्या जागतिक नकाशावर आणण्यासाठी महत्त्वपूर्ण ठरेल. सुरक्षितता, पुरवठा साखळी आणि धोरणात्मक दृष्टीने कौडगाव औद्योगिक क्षेत्राची निवड करण्यात आली असून, महाराष्ट्र शासनाने याला इंटिग्रेटेड प्रोजेक्ट म्हणून मान्यता दिली आहे, अशीही माहिती आमदार पाटील यांनी दिली.
—

बायोगॅस प्लांटसाठी
शेतक-यांकडून घेणार गवत
धाराशिवमध्ये मिसाईल्स आणि संरक्षण साहित्य तयार करण्यासाठी मोठा प्रकल्प साकारत असलेल्या ग्लोब फोर्जकडून जिल्ह्यातील शेतक-यांसाठी नेपियर ग्रासवर आधारित सीबीजी (कॉम्प्रेसड बायोगॅस) प्लांट उभारण्यात येणार आहे. यासाठी लागणारे गवत जिल्ह्यातील शेतक-यांकडून घेतले जाणार आहे. यामुळे शेतक-यांचे उत्पन्न वाढण्यास मोठी मदत होणार आहे, असा विश्वास आमदार पाटील यांनी व्यक्त केला.

भविष्यात ५००० एकरवर डिफेन्स हब
कौडगाव एमआयडीसीला लागूनच भविष्यात जवळपास ५००० एकरांवर संरक्षण क्षेत्राशी निगडित एक महाकाय हब उभारण्याचे नियोजन आहे. ग्लोब फोर्ज (नेबे इंडस्ट्रीज) यांनी तसा शब्द दिला आहे. कौडगावजवळ उपलब्ध १० हजार एकर पडीक जमिनीवर २००४ मध्ये औद्योगिक क्षेत्र विकसित करण्याचे ठरवले होते. सुरुवातीला १५०० एकर संपादित केले. आता डिफेन्स हब साठी पडीक जमीन उपलब्ध करून देण्यात येईल. भविष्यात देशाला संरक्षण साहित्य पुरवणारा जिल्हा म्हणून धाराशिव जिल्ह्याचा नावलौकिक होईल, असा विश्वास आमदार राणाजगजितसिंह पाटील यांनी व्यक्त केला.