छ. संभाजीनगर : प्रतिनिधी
वाईटावर चांगल्याचा, असत्यावर सत्याचा आणि अंध:कारावर प्रकाशाचा विजय म्हणून विजयादशमी या सणाकडे पाहिले जाते. तसेच यादिवशी रावणाच्या पुतळ्याचे दहन करून विजयोत्सव साजरा केला जातो. मात्र छत्रपती संभाजीनगरमध्ये एकेठिकाणी रावणाऐवजी त्याची बहीण शूर्पणखा हिचे दहन करण्यात आले आहे. दहन करण्यापूर्वी आरती गाण्यात आली. तसेच विधीवत हा कार्यक्रम पार पडला. पत्नी पीडित आश्रमातील पदाधिका-यांनी एकत्र येऊन हा कार्यक्रम पार पडला.
विजयादशमीच्या पारंपरिक सणानिमित्त रावण दहनाप्रमाणेच आज पत्नी पीडित पुरुष आश्रमात शूर्पणखा वाईट वृत्ती दहन कार्यक्रम साजरा करण्यात आला. रावणाच्या पुतळ्याचे दहन करण्याची परंपरा अनेक वर्षांपासून सुरू आहे. परंतु महिलांमधील वाईट वृत्ती, समाजघातकी प्रवृत्ती यांचाही नाश व्हावा, या उद्देशाने शूर्पणखा वृत्ती दहनाचा उपक्रम राबविण्यात आला असल्याचे संस्थेचे पदाधिकारी अ‍ॅड. भारत फुलारे यांनी म्हटले.
रावण महापंडित, महापुरुष
फुलारे पुढे म्हणाले की, रावणाचे वर्षानुवर्षे दहन केले जात आहे. रावण हा महापंडित, महापुरुष होता. इतकी वर्षे रावणाच्या पुतळ्याचे दहन केल्यामुळे पुरुषांमधील वाईट वृती जळून भस्मसात झाल्या आहेत. वाईट वृत्ती कमी झाल्या आहेत. पण त्याची बहीण शूर्पणखा (म्हणजे इतर महिला) सुधरली नाही. तिच्यातील वाईट वृत्ती वाढत चालल्या आहेत. महिलांमधील वाईट वृत्तीही जळून खाक व्हाव्यात यासाठी आम्ही शूर्पणखा वाईट वृत्तीचे दहन करत आहोत.
महिला कायद्याचा दुरुपयोग
फुलारे यांनी म्हटले की, पुरुषांवरील अन्याय, खोट्या केसेस, पोटगीचे ओझे, तसेच महिलांकडून कायद्याचा होणारा दुरुपयोग यामुळे अनेक पुरुष आत्महत्या करत आहेत. एनसीआरबीच्या आकडेवारीनुसार पुरुषांच्या आत्महत्यांचे प्रमाण महिलांपेक्षा तिप्पट असल्याचे निदर्शनास आले आहे. अशा परिस्थितीत पुरुषांचेही सबलीकरण होणे आवश्यक असून पुरुषांसाठी स्वतंत्र पुरुष आयोग, घरगुती हिंसाचारापासून संरक्षण कायदा, तसेच प्रत्येक पोलिस ठाण्यात लाय डिटेक्टर सुविधा असावी, अशी मागणी यावेळी करण्यात आली. महिला आयोगाप्रमाणे पुरुष आयोग असावा. महिला दक्षता समिती आहे, तशी पुरुष दक्षता समिती हवी. पुरुष तक्रार निवारण केंद्रही हवे, अशीही खंत फुलारे यांनी व्यक्त केली.
