परभणी : नूतन विद्यालय सेलूने जिल्हास्तरीय क्रीडा स्पर्धेत १४ वर्ष आणि १७ वर्षाखालील वयोगटात उल्लेखनीय यश संपादन करत द्वितीय क्रमांक पटकावला आहे. क्रीडा प्राविण्य प्रोत्साहन अनुदान अंतर्गत नूतन विद्यालयाचा सन्मान पालकमंत्री श्रीमती मेघना साकोरे-बोर्डीकर यांच्या हस्ते करण्यात आला.
या कार्यक्रमात जिल्हाधिकारी रघुनाथ गावडे, जिल्हा पोलीस अधीक्षक रवींद्रसिंह परदेशी, अप्पर जिल्हाधिकारी प्रताप काळे, जिल्हा परिषद मुख्य कार्यकारी अधिकारी नतिशा माथुर, जिल्हा क्रीडा अधिकारी कविता नावंदे उपस्थित होते.
१४ वर्षाखालील वयोगट द्वितीय क्रमांकासाठी ६२,६५४ रोख रक्कम आणि सन्मानपत्र तर १७ वर्षाखालील वयोगट द्वितीय क्रमांकासाठी ६२,६५५ रोख रक्कम आणि सन्मानपत्र प्रदान करण्यात आले. वरील दोन्ही गटांसाठी दोन चेक शाळेला प्रदान करण्यात आले. मुख्याध्यापक संतोष पाटील, क्रीडा शिक्षक गणेश माळवे, शिक्षक बाळू बुधवंत यांनी शाळेचा सन्मान स्वीकारला.
पालकमंत्री बोर्डीकर यांनी नूतन विद्यालयाच्या क्रीडा क्षेत्रातील योगदानाचे कौतुक केले. त्यांनी शाळेने भविष्यात राज्यस्तरावरही यश संपादन करावे अशी अपेक्षा व्यक्त केली. क्रीडा क्षेत्रातील प्रतिष्ठा उंचावली. कार्यक्रम दरम्यान विद्यालयाच्या खेळाडूंनी जिल्ह्यातील क्रीडा क्षेत्रात आपल्या गुणवत्तेने प्रतिष्ठा वाढवली असल्याचे अधोरेखित करण्यात आले. सर्व मान्यवरांनी शाळेच्या पुढील वाटचालीसाठी शुभेच्छा व्यक्त केल्या. नूतन विद्यालयाच्या या यशामुळे शाळेच्या शिरपेचात मानाचा तुरा रोवला आहे.
