लातूर : प्रतिनिधी
पोलीस दलाच्या स्थापना दिनानिमित्त लातूर पोलीस दलाच्या वतीने येथील जिल्हा क्रीडा संकुलावर भव्य प्रदर्शन भरविण्यात आले आहे. शस्त्रास्त्रांसह पोलीस दलाच्या विविध विभागाची माहिती या प्रदर्शनाद्वारे विद्यार्थी व नागरिकांना दिल जात आहे. पोलीसदादांच्या कर्तव्याप्रती विद्यार्थ्यांच्या चेह-यावर उत्सूकता, कुतूहल आणि आश्चर्यही पहावयास मिळाले.
या प्रदर्शनीत लातूर पोलीस दलाच्या सायबर सेल, भरोसा सेल, मानव तस्करी विरोधी पथक, बॉम्बशोधक पथक, शस्त्र विभाग, क्राईम ब्रँच, इन्वेस्टिगेशन व्हॅन, डॉग स्कॉड, वाहतूक सुरक्षा, वायरलेस यंत्रणा, सुरक्षा हेल्पलाइन अशा विविध विभागाच्या माहितीचे आणि शस्त्राचे प्रदर्शन पोलिस स्थापना दिनाच्या (रेझिंग डे) निमित्तत्ताने भरविण्यात आले आहे. राष्ट्रीय महिला आयोगाच्या अध्यक्षा विजया रहाटकर यांच्यासह जिल्हा पोलिस अधीक्षक सोमय मुंडे, अतिरिक्त पोलिस अधीक्षक अजय देवरे यांनी प्रदर्शनाला भेट दिली.
यावेळी पोलिस अधीक्षक सोमय मुंडे विजया रहाटकर यांना पोलिस दलाच्या वेगवेगळ्या विभागाची माहिती दिली. विद्यार्थ्यांनी अन नागरिकांनी पोलिस दलाचे कामकाज जाणून घ्यावे असे आवाहन ही केले. तर सदरचे प्रदर्शन पाहण्यासाठी विद्यार्थ्यांचा उत्स्फूर्त प्रतिसाद मिळत असून अनेक शाळांचे विद्यार्थी, विद्यार्थिनी सहलीच्या रूपाने क्रीडा संकुलात प्रदर्शन पाहत आहेत. यामुळे विद्यार्थ्यांना पोलिस दलाच्या कामकाजाची ओळख होत आहे. जिल्हा क्रीडा संकुलामध्ये पोलिस दलाचे सुरु असलेल्या प्रदर्शनीचा सर्वच विद्यार्थ्यांनी व नागरिकांनी प्रदर्शन पाहून पोलिस दलाच्या कामकाजाची माहिती जाणून घ्यावी, असे आवाहन यावेळी राष्ट्रीय महिला आयोगाचे अध्यक्ष विजया रहाटकर यांनी केले.
