बीड : प्रतिनिधी
कधीही न घडलेल्या गुन्ह्यांचे दाखल झालेले गुन्हे अन् नंतर थेट आमदार धनंजय मुंडेंनी गोळीबार केल्याची तक्रार यामुळे रविवारचा दिवस चर्चेचा आणि बीड पोलिसांना तापदायक ठरला. दिवसभराच्या गोंधळानंतर हा सर्व प्रकार खोटा असल्याचे पोलिसांनी स्पष्ट केले गेले.
मस्साजोगचे दिवंगत सरपंच संतोष देशमुख यांचे बंधू धनंजय देशमुख यांनी शिवीगाळ केली, तसेच त्यांच्या पोलिस अंगरक्षकाची पिस्तूल काढून ती आपल्या कानशिलावर लावून जिवे मारण्याचा प्रयत्न केल्याची तक्रार समाधान खिंडकर यांनी बीड ग्रामीण पोलिसांत दिली होती. यावरून धनंजय देशमुखांवर गुन्हा नोंद झाला होता. तर याच प्रकरणात धनंजय देशमुख यांनीही समाधान खिंडकर यांनी आपल्याला शिविगाळ केली. त्यांच्याकडे पिस्तूल होते, त्यांनीही जिवे मारण्याची धमकी दिली अशी तक्रार दिली. त्यामुळे परस्पर विरोधी गुन्हे बीड ग्रामीण पोलिस ठाण्यात नोंद झाले होते. या प्रकरणी पोलिस तपास सुरू करण्यात आला होता. मात्र, दिवसअखेर प्रकरणास वेगळे वळण मिळाले.
मुंडेंविरोधातील तक्रार मागे
धनंजय देशमुखांवर समाधान खिंडकर यांच्या तक्रारीवरून दाखल झालेला गुन्हा खोटा असल्याचे पोलिसांकडून स्पष्ट केल्यानंतर धनंजय देशमुख यांनी आमदार धनंजय मुंडेंविरोधात दिलेली तक्रार मागे घेतली. यात कुठलाही गुन्हा नोंद केला नाही.
पोलिस अधिका-यांवर कारवाई शक्य
या प्रकरणात यंत्रणांचा गैरवापर करत खोट्या तक्रारी दिल्याने दोन्ही तक्रारदारांवर कारवाई होऊ शकते. सोबतच पुरेशी खात्री न करता गुन्हे नोंद केल्याने किंवा या प्रकरणात हलगर्जीपणा दाखवल्याने बीड ग्रामीण ठाण्याचे पोलिस अधिकारी, कर्मचा-यांवर कारवाई होऊ शकते.
सर्वच गुन्हे खोटे, यंत्रणेचा गैरवाप : पोलिसांचे स्पष्टकरण
या प्रकारानंतर रविवारी दुपारी धनंजय देशमुख यांनी बीड ग्रामीण ठाणे गाठून आमदार धनंजय मुंडे व शिवसेनेचे माजी जिल्हाप्रमुख परमेश्वर सातपुते यांनी आपल्याला पाली गावाजवळ घाटात अडवले. या वेळी धनंजय मुंडे यांनी दोन गोळ्या पिस्तुलातून फायर केल्या. तर परमेश्वर सातपुते यांनी पिस्तूल कानशिलावर लावल्याची तक्रार दिली. तसेच गुन्हा नोंद करण्यासाठी बीड पोलिस ठाण्यात ठिय्या दिला.
खोट्या गुन्ह्यामुळे देशमुखांकडून मुंडे टार्गेट
आपल्यावर खोटा गुन्हा नोंद होत आहे. पोलिसांनी आधी सीसीटीव्ही व इतर बाबींची पडताळणी करावी. मग योग्य निर्णय घ्यावा, असे धनंजय देशमुख यांनी पोलिसांना रात्री सांगितले. पोलिसांनी त्यांना आम्ही खोटा गुन्हा घेणार नाही, असे आश्वासन देत परत पाठवले. मात्र ते गेल्यानंतर त्यांच्यावर गुन्हा नोंदवला. देशमुख यांनी थेट मुंडे यांच्याविरोधात तक्रार दिली. ज्या प्रमाणे माझ्याबाबत पडताळणी झाली नाही त्याचप्रमाणे आताही पडताळणी न करता गुन्हा नोंद करा अशी भूमिका घेत त्यांनी पोलिसांना कोंडीत पकडले.
