अहमदाबाद : वृत्तसंस्था
अहमदाबादच्या वटवाजवळ मुंबई-अहमदाबाद बुलेट ट्रेन प्रकल्पाच्या बांधकामादरम्यान सेगमेंटल लॉन्चिंग गॅन्ट्री निसटली. रात्री ११ वाजण्याच्या सुमारास हा अपघात झाल्याने मुंबई-अहमदाबाद रेल्वे मार्गावरील गाड्यांच्या वाहतुकीवर परिणाम झाला. अपघातामुळे २५ गाड्या रद्द करण्यात आल्या आहेत तर काही शॉर्ट टर्मिनेट करण्यात आल्या आहेत.
काँक्रीट गर्डर टाकल्यानंतर गॅन्ट्री मागे घेतली जात असताना त्याचा तोल सुटला आणि हा अपघात घडला.
या दुर्घटनेनंतर रेल्वे प्रशासनाने तातडीने अपघात निवारण ट्रेन रवाना केली आणि नॅशनल हाय-स्पीड रेल कॉर्पोरेशन लिमिटेडचे वरिष्ठ अधिकारी, पोलीस आणि अग्निशमन विभागाचे पथक घटनास्थळी पोहोचले. या अपघातानंतर जवळपास २५ गाड्या रद्द करण्यात आल्या आहेत. तर ५ गाड्यांचे वेळापत्रक बदलण्यात असून ६ गाड्यांचे मार्ग बदलण्यात आले.
रेल्वे मार्ग मोकळा करण्याचे प्रयत्न सुरू आहेत जेणेकरून लवकरात लवकर वाहतूक पूर्ववत करता येईल. या कामासाठी क्रेनचाही वापर करण्यात येत आहे, अशी माहिती अधिका-यांनी दिली.
अपघातानंतर रेल्वे प्रशासनाने वटवा-बोरिवली एक्सप्रेस, अहमदाबाद-मुंबई सेंट्रल एक्सप्रेस, वडोदरा-वटवा इंटरसिटी, अहमदाबाद-वलसाड गुजरात क्वीन, जामनगर-वडोदरा इंटरसिटी, वडनगर-वलसाड-वडनगर एक्सप्रेस, वाटवा-आनंद एक्सप्रेस यासह सुमारे २५ गाड्या रद्द केल्या आहेत.
