एकाच दिवशी ८ सुवर्ण, बॉक्सरचा धमाका, ७ पदकांची कमाई
ग्लासगो : वृत्तसंस्था
भारतासाठी शनिवारचा दिवस गोल्डन डे ठरला. कारण राष्ट्रकुल क्रीडा स्पर्धेत आज एकाच दिवशी भारतीय क्रीडापटूंनी तब्बल ८ सुवर्ण पदकांची कमाई केली. यामध्ये भारतीय बॉक्सरनी सुवर्ण धमाका करीत एकाच दिवशी ७ सुवर्ण पदके पटकावली. सर्वप्रथम जॅस्मिन लांबोरिया (महिला ५७ किलो बॉक्सिंग), प्रीती पवार (महिला ५४ किलो बॉक्सिंग) या दोघींनी सुवर्ण कमाई केली. त्यानंतर साक्षी चौधरी (महिला ५१ किलो बॉक्सिंग), प्रिया घंसास (६० किलो बॉक्सिंग), अरुंधती चौधरी (७० किलो बॉक्सिंग) आणि अंकुश पंघाल (७५ किलो) आणि सचिन सिवाच (६० किलो) अशा ७ बॉक्सरनी सुवर्ण पदक पटकावले तर पॅरा एफ ५७ शॉट पुटमध्ये सोमन राणाने सुवर्ण कमाई केली. याच स्पर्धेत शुभम जुयालने रौप्य पदक मिळवत एकाच स्पर्धेत प्रथमच दुहेरी पदकाची कमाई करण्याचा मान या जोडीने मिळविला. विशेष म्हणजे आजच्या दिवशी भारताच्या ५ लेकींनी ५ सुवर्ण पदके पटकावली. एकूण १० बॉक्सरनी पदकांची लयलूट केली.
प्रारंभी जॅस्मिनने अंतिम फेरीत उत्तर आयर्लंडच्या मायकेला वॉल्शचा तर प्रीतीने कॅनडाच्या सवाना डोलमागोचा पराभव केला. यासोबतच साक्षी चौधरीने इंग्लंडच्या रुबी व्हाईटला, साक्षी चौधरीची चुलत बहीण प्रिया घंसासने कॅनडाच्या मारी-बथूल अल-अहमदियेहला आणि अरुंधती चौधरीने इंग्लंडच्या शँटल रिडला पराभूत करून सुवर्ण पदक पटकावले. यासोबतच भारतीय बॉक्सर अंकुश पंघालने इंग्लंडच्या डिमेजी शिट्टूचा पराभव केला. ७५ किलो वजन गटात ही लढत झाली तर सचिन सिवाचने नामिबियाच्या ट्रायअगेन मॉर्नी न्देवेलोचा पराभव करीत आठवे सुवर्ण पदक मिळविले. ६० किलो वजन गटात ही लढत झाली. या आधी पॅरा शॉट पुटमध्ये सोमन राणाने सुवर्ण कमाई केली होती. त्यामुळे बॉक्सिंगचे ७ आणि पॅरा शॉटमधील १ अशा ८ सुवर्ण पदकांची आज भारताने कमाई केली.
भारतीय बॉक्सरनी आज सुरुवातीला २ सुवर्ण पदकांची कमाई करून दिली. त्याचवेळी ७ भारतीय बॉक्सरनी अंतिम फेरीत धडक मारली होती. त्यामुळे या बॉक्सरच्या कामगिरीकडे भारतीयांचे लक्ष लागले होते. या बॉक्सरनी भारतीयांचा विश्वास सार्थ ठरवित ७ सुवर्णची कमाई केली. यातील जादूमणी सिंग मांडेंगबाम (५५), लव्हलिना बोर्गोहेन (७५) आणि नरेंद्र बेरवाल (९०) या तीन भारतीय बॉक्सरना रौप्य पदकावरच समाधान मानावे लागले. यासोबतच पॉरा शॉट पुट (गोळाफेक) मध्ये भारताच्या शुभम जुयाललाही रौप्य पदक मिळाले.
एकाच प्रकारात
२ पदकांची कमाई
भारताच्या सोमन राणाने पॅरा शॉट पुट (गोळाफेक) स्पर्धेच्या एफ-५७ गटात हंगामातील सर्वोत्तम कामगिरीची नोंद करत सुवर्णपदक जिंकले. याच स्पर्धेत भारताच्याच शुभम जुयालने रौप्यपदक मिळवले.
ट्रिपल जंपमध्ये
आणखी २ पदके
पुरुष गटातील ट्रिपल जंप प्रकारात भारताने आणखी दोन पदके जिंकली आहेत. प्रवीण चित्रवेलने १६.५८ मीटरची उडी मारून रौप्य पदक पटकावले तर त्याचा सहकारी भारतीय खेळाडू सेल्वा प्रभूने १६.५२ मीटरच्या सर्वोत्तम कामगिरीसह कांस्य पदक जिंकले.
