श्रीलंकेचा धुव्वा, ६९ धावांत गुंडाळले
आयची-नागोया : वृत्तसंस्था
भारतीय महिला क्रिकेट संघाने २०२६ च्या आशियाई क्रीडा स्पर्धेत ऐतिहासिक सुवर्णपदकावर नाव कोरले. भारताच्या महिला क्रिकेट संघाने अंतिम सामन्यात श्रीलंकेच्या महिला क्रिकेट संघाचा तब्बल १४७ धावांनी पराभव करत सुवर्णपदक जिंकले.
जपानमधील आयची-नागोया येथे सुरू असलेल्या आशियाई क्रीडा स्पर्धा २०२६ मध्ये हरमनप्रीत कौरच्या नेतृत्वाखालील टीम इंडियाने श्रीलंकेचा एकतर्फी पराभव करीत सुवर्णपदक जिंकून इतिहास रचला. आशियाई क्रीडा स्पर्धेतील भारताचे हे पहिले सुवर्णपदक ठरले. स्मृती मानधना आणि शफाली वर्माच्या धमाकेदार खेळीच्या जोरावर टीम इंडियाने प्रथम फलंदाजी करताना निर्धारित २० षटकांत ३ विकेटस्च्या मोबदल्यात विक्रमी २१६ धावा करीत श्रीलंकेसमोर तगडे आव्हान ठेवले आणि या लक्ष्याचा पाठलाग करताना श्रीलंकेचा डाव १५.४ षटकांत अवघ्या ६९ धावांवर आटोपला.
कोरोगी स्पोर्टस पार्कमध्ये भारत आणि श्रीलंकेमध्ये हा अंतिम सामना रंगला. या सामन्यात टीम इंडियाने श्रीलंकेचा तब्बल १४७ धावांनी पराभव करीत आशियाई क्रीडा स्पर्धेतील पहिले सुवर्णपदक जिंकले. त्यामुळे श्रीलंकेला रौप्य पदकावरच समाधान मानावे लागले. या आधी पाकिस्तानने बांगला देशचा पराभव करीत कांस्यपदक पटकावले होते. फायनलमध्ये भारताने श्रीलंकेचा एकतर्फी पराभव केला.
