बीड : प्रतिनिधी
बीडमधील मस्साजोग येथील सरपंच संतोष देशमुख हत्या प्रकरणाला अवघे काही महिनेच उलटले आहेत. पण तरीही बीडमध्ये गुन्हेगारीचे सत्र सुरूच आहे. याचदरम्यान, बीडच्या माजलगाव शहरात भरदिवसा एका तरुणाची धारदार कोयत्याने वार करून हत्या केल्याचा धक्कादायक प्रकार उघडकीस आला आहे.
बाबासाहेब आगे असे मयत तरुणाचे नाव आहे. हत्या करणारा आरोपी स्वत: पोलिस स्टेशनमध्ये हजर झाला असून आर्थिक देवाणघेवाणीच्या वादातून हत्या केल्याची प्राथमिक माहिती समोर आली आहे. तर नारायण शंकर फफाळ असे आरोपीचे नाव आहे.
माजलगाव शहरातील स्वामी समर्थ मंदिराजवळ भर वस्तीत घडलेल्या या घटनेने खळबळ उडाली आहे. नराधमांना कायद्याचा धाक उरलेला आहे की नाही? असा प्रश्न देखील आता उपस्थित होत आहे. माजलगाव तालुक्यातील किटी आडगाव ग्रामपंचायतचे सदस्य असलेले बाबासाहेब आगे हे भाजपच्या तालुका अध्यक्ष अरुण राऊत यांच्या भेटीसाठी माजलगाव शहरात स्वामी समर्थ मंदिराजवळ भाजप कार्यालय येथे आले होते. त्या कार्यालयाच्या समोरच त्यांच्यावर धारदार शस्त्राने हल्ला करण्यात आला आणि यात त्यांचा जागीच मृत्यू झाला.
आरोपी नारायण शंकर फफाळ याने कोयता शर्टच्या पाठीमागे लपवून आणला होता. त्यानंतर सपासप वार करून त्याने भरदिवसा या तरुणाची हत्या केली. स्वत: आरोपी नारायण शंकर फफाळ हा माजलगाव शहर पोलिस ठाण्यामध्ये हजर होऊन त्याने हत्येची कबुली दिली आहे.
