मुंबई : प्रतिनिधी
अजित पवारांच्या राष्ट्रवादीतील अंतर्गत हालचालींना वेग आला आहे. संतोष देशमुख हत्या प्रकरण आणि वाल्मिक कराड प्रकरणावरून विरोधकांकडून मंत्री धनंजय मुंडे यांच्या राजीनाम्याची मागणी जोर धरत आहे. अद्याप तरी मुंडेंनी राजीनामा दिला नसला तरी येत्या काही दिवसांत ते राजीनामा देतील अशी शक्यता अधिक आहे. दुसरीकडे राज्य शासनाकडून मिळणा-या सदनिका बनावट दस्तावेज करून लाटल्या प्रकरणात कृषिमंत्री माणिकराव कोकाटे यांना न्यायालयाने दोषी ठरवले आहे. या सर्व घडामोडींनंतर आता अजित पवार गटातून दोन्ही मंत्र्यांच्या राजीनाम्यावरून वाद-प्रतिवाद होत असल्याचे सांगितले जात आहे.
दरम्यान, राष्ट्रवादी काँग्रेसचे दोन विद्यमान कॅबिनेट मंत्री यांचा राजीनामा घेण्यावरून राष्ट्रवादी काँग्रेसमध्येच मतमतांतरे असल्याची चर्चा आता जोर धरू लागली आहे. पुढील आठवड्यात राज्याचे अर्थसंकल्पीय अधिवेशन सुरू होत आहे. त्यापूर्वी हे प्रकरण निकाली काढावे असे पक्षातील काही नेत्यांचे म्हणणे आहे.
महायुतीतील राष्ट्रवादीच्या दोन कॅबिनेट मंत्र्यांवर मोठा आरोप होत आहे. मुंडे आणि कोकाटे प्रकरणामुळे विरोधकांकडून पक्षावर टोकाचे आरोप केले जात आहेत. जोपर्यंत राजीनामा दिला जात नाही तोपर्यंत अशा प्रकारचे आरोप वारंवार केले जातील. विशेष म्हणजे धनंजय मुंडे यांची प्रकृती सध्या ठीक नाही. आधीच संतोष देशमुख हत्या प्रकरणामुळे धनंजय मुंडेंवर अनेक आरोप झाले आहेत. त्यामुळे आरोग्याचे कारण पुढे करीत तूर्तास त्यांचा राजीनामा घ्यावा आणि वाद टाळावा असा मतप्रवाह राष्ट्रवादीच्या काही वरिष्ठ नेत्यांचा आहे.
मात्र त्यास पक्षाचे राष्ट्रीय कार्याध्यक्ष प्रफुल्ल पटेल, प्रदेशाध्यक्ष सुनील तटकरे यांचा विरोध असल्याची माहिती आहे. दुसरीकडे विद्यमान कृषिमंत्री माणिकराव कोकाटे यांना नाशिक न्यायालयाने दोषी ठरवले आहे. राज्य शासनाच्या सदनिका बनावट दस्तावेज प्रकरणात त्यांनी वरिष्ठ न्यायालयात धाव घेतली आहे. मात्र जर कोकाटेंना वरिष्ठ न्यायालयात दिलासा मिळाला नाही तर येऊ घातलेल्या अर्थसंकल्पीय अधिवेशनातच राष्ट्रवादीची आणि महायुती सरकारची कोंडी होण्याची दाट शक्यता आहे. यामुळे न्यायालयाच्या निकालानंतर कोकाटे यांचा तात्काळ राजीनामा घेतला जावा अशी भूमिका राष्ट्रवादीच्या एका गटाची आहे. त्यामुळे येत्या काही दिवसांत राष्ट्रवादीचे दोन कॅबिनेट मंत्री धनंजय मुंडे आणि माणिकराव कोकाटे यांच्याबाबत काही महत्त्वाच्या घडामोडी घडण्याची शक्यता आहे.
