लातूर : प्रतिनिधी
रोटरी क्लब लातूरच्या वतीने औद्योगिक प्रशिक्षण संस्था लातूर येथे होतकरू विद्यार्थ्यांसाठी सायकल बँक स्थापन करण्यात आली. याचे उद्घाटन रोटरीचे माजी प्रांतपाल डॉ. ओमप्रकाश मोतीपवळे, रोटरीचे अध्यक्ष जकीखान कायमखानी, सचिव विश्वनाथ निगुडगे याच्या हस्ते झाले. यावेळी औद्योगिक प्रशिक्षण संस्थेतील गरजू, होतकरू मुलींना या सायकलींचे वाटप करण्यात आले.
यावेळी डॉ. ओमप्रकाश मोतीपवळे म्हणाले, विद्यार्थ्यांनी अभ्यासात सातत्य ठेवावे, त्यासाठी वेळेचे नियोजन करावे. जुन्या काळामध्ये शिक्षण घेण्यासाठी भरपूर कसरत करावी लागायची. शाळा, महाविद्यालयाचे दूर असायची. आजसारखी प्रवास व्यवस्था नसायची. चालत जावे लागायचे. आज आपल्याला रोटरी सारख्या संस्था मदत करण्यात पुढे आहेत. याचा आपल्या भविष्य बनविण्यासाठी उपयोग करून एक यशस्वी व्यक्ती व्हावे, असे आवाहन डॉ. मोतीपवळे यांनी केले.
रोटरीचे अध्यक्ष जकीखान कायमखानी म्हणाले, जीवनात सकारात्मक उद्देश हा खूप महत्वाचा आहे. आपल्या जीवनात ध्येय निश्चिती फार महत्वाची आहे. विद्यार्थ्यांनो तुम्ही जीवनात यशस्वी व्हाल यात शंका नाही. आपल्या गुरुजनांचा, आई-वडिलांचा नेहमी सन्मान करावा. रोटरी क्लब लातूरच्या वतीने पहिल्यांदाच सायकल बँकेची संकल्पना अमलात आणली आहे.
ज्या संस्थेत गरीब, होतकरू विद्यार्थी लांबून प्रवास करतात. त्या महाविद्यालयांना नवीन सायकली घेऊन द्यायच्या. विद्यार्थ्यांनी जोपर्यंत आपला कोर्स सुरू आहे तो पर्यंत ती वापरायच्या व नंतर त्या महाविद्यालयात जमा करायच्या. महाविद्यालयाने त्याची दुरूस्ती करून पुढे येणा-या विद्यार्थ्यांसाठी त्या वापरता येतील, याची सुविधा करायची. जेणेकरून त्या सायकलींचा पुरेपूर विद्यार्थ्यांना उपयोग करता येईल, असे रोटरीचे अध्यक्ष जकीखान कायमखानी म्हणाले. या वेळी रोटरीचे प्रोजेक्ट चेअरमन अनिरुद्ध मुचलंबकर, मोहन परदेशीं, सुनील कोचेटा, हरिप्रसाद सोमाणी, सॅटेलाईट क्लबच्या अध्यक्ष कौशल्या सोनकवडे, वनिता लचुरिया सह सर्व रोटरियन तसेच औद्योगिक प्रशिक्षण संस्थेतील विद्यार्थी, प्राध्यापकांची उपस्थिती होती.
