छ. संभाजीनगर : प्रतिनिधी
लिव्ह इन रिलेशनशिपमध्ये राहणा-या तरुण-तरुणीने आत्महत्या केल्याची धक्कादायक घटना संभाजीनगरमध्ये घडली. पैठण तालुक्यातील कातपूर येथे गेल्या अनेक वर्षांपासून लिव्ह इन रिलेशनशिपमध्ये राहणा-या जोडप्याने विषारी औषध प्राशन करून आत्महत्या केली. या दोघांनी आत्महत्या का केली याचे कारण अस्पष्ट आहे. नवनाथ आणि शीतल अशी आत्महत्या केलेल्या जोडप्याची नावे आहेत. त्यांच्या आत्महत्येमुळे संभाजीनगरमध्ये खळबळ उडाली आहे.
मिळालेल्या माहितीनुसार, पैठण एमआयडीसी पोलिस ठाण्याच्या हद्दीत असलेल्या कातपूर येथे नवनाथ शामराव जगधने (३० वर्षे) आणि शीतल दोडवे-उघडे (२८ वर्षे) हे दोघे ५ वर्षांपासून लिव्ह इन रिलेशनशिपमध्ये रहात होते. दोघांनीही घराच्या टेरेसवर गोचीड मारण्याचे विषारी औषध प्राशन करून आत्महत्या केली. नवनाथ गुन्हेगार होता. तो जन्मठेपेची शिक्षा भोगत होता. पॅरोलवर तो बाहेर आला होता. त्याचवेळी दोघांनीही टोकाचे पाऊल उचलत आत्महत्या केली.
नवनाथ जगधनेला जालन्यातील अंबड येथे ६ वर्षीय मुलाच्या हत्येप्रकरणी अटक करण्यात आली होती. याप्रकरणी त्याला जन्मठेपेची शिक्षा झाली होती आणि तो कारागृहात शिक्षा भोगत होता. सध्या तो एका महिन्याच्या पॅरोल सुटीवर आला होता. त्याला २८ मार्चला पुन्हा शिक्षा भोगण्यासाठी तुरुंगात जायचे होते. पण त्यापूर्वीच नवथान आणि शीतलने आत्महत्या केली.
महत्त्वाचे म्हणजे, नवनाथने ज्या ६ वर्षांच्या मुलाची हत्या केली होती तो मुलगा शीतलचा होता. शीतल ही कातपूरची राहणारी होती. तिचा विवाह काही दिवसांपूर्वी अंबडमधील एका तरुणासोबत झाला होता. २०२० मध्ये शीतलला भेटण्यासाठी नवनाथ तिच्या सासरी गेला होता. यावेळी प्रेमात अडथळा ठरणा-या शीतलच्या मुलाची नवनाथने हत्या केली होती.
याप्रकरणी शीतल आणि नवनाथ या दोघांविरोधात गुन्हा दाखल करत पोलिसांनी त्यांना अटक केली होती. याप्रकरणात शीतलची निर्दोष मुक्तता झाली होती तर नवनाथला जन्मठेपेची शिक्षा सुनावण्यात आली होती. शीतल ही गेल्या काही दिवसांपासून संभाजीनगरमध्ये भाड्याने घर घेऊन राहत होती. अशातच पॅरोलमध्ये सुटून आलेला नवनाथ घरी आला. त्यावेळी शीतल आणि त्याने विष प्राशन करून आयुष्य संपवले.
