शेगाव : येथे श्री संत गजानन महाराज यांचा १४७ वा प्रकटदिन उत्सव आज (दि.२०) माघ वद्य सप्तमी रोजी श्री संस्थानच्या धार्मिक प्रथा-परंपरांनुसार मोठ्या उत्साहात व भक्तिभावाने साजरा करण्यात आला. यावेळी श्री गजानन महाराजांच्या दर्शनासाठी राज्याच्या कानाकोप-यातून आलेल्या लाखो भाविकांच्या मांदियाळीने मंदिर परिसर फुलून गेला होता. जुन्या दिंड्यांना भजनी साहित्य दुरूस्तीसाठी सानुग्रह अंशदान देण्यात आले. प्रकटदिनानिमित्त श्री गजानन महाराज मंदिर परिसर विद्युत रोषणाई, केळीचे खांब व फुलांनी सुशोभित करण्यात आला होता. ‘गण गण गणात बोते’ या नामघोषाने भक्तीचा मळा फुलल्याचे चैतन्यमयी चित्र दिसून येत होते. लाखोंच्या संख्येने आलेल्या भाविकांनी शिस्तबद्ध रांगांतून दर्शन व महाप्रसाद घेतला. दुपारी श्रींच्या पालखीची नगरपरिक्रमा निघाली. प्रकटदिन उत्सवात १००१ भजनी दिंड्यांनी सहभाग घेतला.
