लातूर : प्रतिनिधी
जिल्ह्यात वेगवेगळ्या ठिकाणी सुरु असलेल्या हातभट्टी तयार करण्याच्या भट्ट्यांवर लातूर पोलीस दलाच्या वतीने छापे टाकुन सुमारे १ लाख ७१ हजार रुपयांचा मुद्देमाल जप्त करुन अनेकांविरुद्ध कारवाई केली आहे. लातूर जिल्ह्यातील अवैध धंद्यावर प्रभावी कारवाई करण्यासाठी विशेष मोहीम राबवून अवैध धंद्यावर कार्यवाही करण्याचे आदेश पोलीस अधीक्षक सोमय मुंडे यांनी दिले आहेत. त्याचाच एक भाग म्हणून दि. ११ मे रोजी रविवारी पहाटे मासरेडचे आयोजन करून लातूर जिल्ह्यातील लपून-छपून हातभट्टी तयार करणा-या ठिकाणावर जोरदार कारवाई करत हातभट्टी दारु तयार करणारे, देशी-विदेशी दारुची अवैध विक्री व्यवसाय करणा-या ७३ लोकांवर ७३ गुन्हे दाखल करून १ लाख ७१ हजार २८२ रुपयांचा मुद्देमाल जप्त व हातभट्टीच्या मुद्देमाल नष्ट करण्यात आला आहे.
अवैध धंद्यावर कार्यवाही करण्यासाठी २३ पोलीस अधिकारी, १०५ पोलीस अमलदारांचे विशेष पथके बनवून राबविण्यात आलेल्या मासरेड मध्ये लातूर जिल्ह्यातील विविध पोलीस ठाण्याच्या हद्दीमधील दुर्गम भागात लपून- छपून हातभट्टी तयार करून त्याची साठवणूक व विक्री करणा-यावर तसेच देशी-विदेशी मद्याची अवैद्य विक्री व्यवसाय करणा-यांवर गुन्हे दाखल करण्यात आले आहेत. यामध्ये हातभट्टी, हातभट्टीचे रसायन, हजारो लिटर देशी व विदेशी दारू असा एकूण १ लाख ७१ हजार २८२ रुपयांचा मुद्देमाल जप्त, हजारो लिटर हातभट्टी दारू व हातभट्टीचे रसायन नष्ट करण्यात आले आहे.
अवैध धंद्याचे समूळ उच्चाटन करण्यासाठी पोलीस अधीक्षक सोमय मुंडे, अपर पोलीस अधीक्षक डॉ.अजय देवरे यांचे सूचना व मार्गदर्शनात लातूर पोलिसा कडून अवैध धंद्याविरुद्ध जोरदार कारवाई करण्यात येत असून सदरची कारवाई यापुढेही सुरूच राहणार आहे.
