सना : वृत्तसंस्था
येमेनमधील हूती बंडखोर आणि आखातातील प्रमुख मुस्लिम देश सौदी अरेबिया यांच्यात मोठे युद्ध होण्याचा धोका बळावला आहे. सौदी अरेबियाने अमेरिकेच्या नेतृत्वाखालील हल्ल्यांमध्ये सहभागी होऊ नये, अशी उघड धमकी हुतींनी दिली आहे. यासोबतच त्यांनी सौदीच्या तेल आस्थापनांवर हल्ले करण्याची भाषा केली आहे.
येमेनच्या शिया अतिरेकी गटाने बुधवारी, ९ एप्रिल रोजी सौदी अरेबियाला हुती बंडखोरांवर अमेरिकेच्या नेतृत्वाखाली केलेल्या हल्ल्यांमध्ये सामील न होण्याचा इशारा दिला. सौदी राजसत्तेच्या नेतृत्वाखालील जगातील सर्वात मोठी तेल कंपनी सौदी अरामकोवर यापूर्वी झालेल्या हल्ल्यांचे फोटोही शेअर केले आहेत.
इस्रायलच्या सेवेसाठी येमेनविरुद्ध हल्ला करण्यासाठी सौदी-अमेरिकेच्या लष्करी कारवायांना वेग आला आहे, असे हुती लष्करी दलाने ‘एक्स’वरील पोस्टमध्ये म्हटले आहे. सौदी अरेबियासाठी : यात सामील होऊ नका- आपले तेल संपणार नाही. आम्ही सौदी अरेबियावरील आकाशाला आगीच्या ढगांमध्ये रूपांतरित करू, ज्याकडे संपूर्ण जगाचे लक्ष असेल.’
यापूर्वी सौदी अरेबिया येमेनमधील हुतींशी दशकभरापासून लष्करी संघर्ष करत होता, परंतु शिया गटाला रोखण्यात तो अपयशी ठरला होता. हूतींनी राजधानी सना ताब्यात घेतल्यानंतर सौदी अरेबिया येमेनच्या संघर्षातून बाहेर पडण्याचा प्रयत्न करत होता. तर ७ ऑक्टोबर २०२३ रोजी इस्रायलवर हमासने हल्ला केला होता. त्यानंतर इस्रायलने गाझामध्ये लष्करी कारवाई सुरू करून सौदी-हुती शांतता चर्चा थांबवली होती.
