छत्रपती संभाजीनगर : प्रतिनिधी
लोकसभा निवडणुकीआधी मला शिंदे गटाकडून ऑफर होती, संजय शिरसाट यांनी माझ्याकडे काही माणसं पाठवली होती. तर भाजपाने देखील राज्यपालपदाची ऑफर दिल्याचा दावा शिवसेना उद्धव बाळासाहेब ठाकरे पक्षाचे नेते चंद्रकांत खैरे यांनी काल केला होता. यावर राज्याचे सामाजिक न्याय तथा जिल्ह्याचे पालकमंत्री संजय शिरसाट यांनी भाष्य केले आहे. हो, खैरेंना आम्ही ऑफर दिली होती, अशी कबुलीच त्यांनी दिली आहे. खैरे यांनी तेव्हा आमची ऑफर स्वीकारली असती तर ते खासदार असते, असेही शिरसाट म्हणाले.
छत्रपती संभाजीनगर जिल्ह्यात शिवसेना विरुद्ध उद्धवसेना असा संघर्ष सध्या जोरात सुरू आहे. पक्ष फोडल्यानंतर आता स्थानिक नेते, पदाधिका-यांना आपल्या पक्षात घेण्यासाठी शिवसेना शिंदे गट सक्रिय झाला आहे. माजी महापौरांसह, पदाधिकारी, शिवसैनिकांना पक्षात घेत उद्धव ठाकरेंच्या पक्षाला हादरे देण्याचे काम गेल्या काही महिन्यांपासून जिल्ह्यात सुरू आहे. आणखी दहा ते बारा माजी नगरसेवक लवकरच शिवसेना शिंदे गटात प्रवेश करणार आहेत.
या पार्श्वभूमीवर दोन्ही बाजूने रोज एकमेकांवर टीका, आरोप-प्रत्यारोप सुरू आहेत.
शिवसेना नेते चंद्रकांत खैरे यांनी काल लोकसभा निवडणुकीपूर्वी आपल्याला शिवसेना शिंदे गट आणि भाजपाकडून ऑफर होती, असा दावा करत खळबळ उडवून दिली होती. यावर संजय शिरसाट यांनी खैरेंच्या दाव्याची पुष्टी केली आहे. हो, नक्कीच आम्ही तेव्हा लोकसभेची निवडणूक असल्याने चंद्रकांत खैरे यांना ऑफर दिली होती. शिवसेनेतील ते ज्येष्ठ नेते आहेत, आम्हाला पक्ष वाढवायचा असल्याने तेव्हा आम्ही त्यांना आमच्या पक्षाकडून लोकसभा लढवण्याची विचारणा केली होती.
चंद्रकांत खैरे यांनी तेव्हा आमची ऑफर स्वीकारली असती आणि लोकसभेची निवडणूक लढवली असती तर ते आज खासदार असते. मात्र, त्यावेळी त्यांनी आमची ऑफर नाकारली आणि आज त्यांना माजी खासदार म्हणून फिरावे लागत आहे. ऑफर नाकारल्यामुळे त्यांच्याच विरोधात आम्हाला लोकसभेची निवडणूक लढवावी लागली. संदिपान भुमरे हे लोकसभा लढले आणि जिंकले देखील, असे संजय शिरसाट यांनी सांगितले.
लोकसभा निवडणुकीपूर्वी शिवसेना शिंदे गटाकडून आपल्याला खासदार पदाची तर भाजपाकडून राज्यपाल पदासाठी ऑफर आली होती. लोकसभा निवडणूक होण्याआधी शिवसेना शिंदे गटाने माझ्याकडे काही माणसे पाठवून मला उमेदवारीची ऑफर दिली होती. असे खैरे म्हणाले.
