मुंबई : प्रतिनिधी
काँग्रेसचे माजी आमदार रवींद्र धंगेकर यांनी उपमुख्यमंत्री एकनाथ शिंदे यांच्या उपस्थितीत शिंदेसेनेत प्रवेश केला आहे. २०२३ च्या कसबा विधानसभा पोटनिवडणुकीत धंगेकर यांनी भाजपचे हेमंत रासने यांचा पराभव केला होता. शिवसेनेचा नगरसेवक म्हणून मी १० वर्षे काम केले आहे. परिवारामध्ये पुन्हा काम करण्याची संधी मिळाली असल्याचे धंगेकर म्हणाले. सोबतच भाजपच्या लोकांनी मला त्रास दिला असल्याचे स्पष्ट केले.
दरम्यान, ११ मार्च रोजी माजी आमदार रवींद्र धंगेकर यांनी आपल्या शेकडो कार्यकर्त्यांसोबत शिवसेना शिंदे गटात प्रवेश घेतला. या वेळी बोलताना, रवींद्र धंगेकर यांनी सांगितले की, कर्ज काढून गणेश पेठेतील जागा विकत घेतली होती. त्या व्यवहारात कोणतीही फसवणूक नव्हती. तरी भाजपाच्या लोकांनी त्या कामात अडथळा निर्माण केला. वक्फ बोर्डाची जागा असेल तर मुस्लिम बांधवांनी आक्षेप घेतला पाहिजे. पण भाजपाचे लोक आक्षेप घेत आहेत. यातून मला अडकविण्याचे त्यांचे धोरण असल्याचे दिसून येते.
ती जागा वक्फ बोर्डाची असल्याचे सांगून माझ्या पत्नीला अटक करण्याचा प्रयत्न झाला. मला त्रास दिला गेला असला, तरी पक्ष बदलण्याचे कारण हे नाही, वेगळेच आहे. मी कुणाच्याही दबावाला बळी पडणारा नाही. मी विकास कामांसाठी शिंदे गटात प्रवेश केला, असे धंगेकर यांनी स्पष्ट केले.
विधानसभेला, लोकसभेला हा विषय आला
पुढे बोलताना धंगेकर यांनी सांगितले की, विधानसभेला, लोकसभेला हा विषय आला. राजकीय लोकांनी मसाला भरून यात मला अडचणीत आणण्याचे काम केले. मी या त्रासाला शून्य टक्के घाबरतो. हा विषय सात-आठ महिन्यांपासून आहे. माझी कोंडी वगैरे कोणी केली नाही. ते संजय राऊतांचे मत आहे, असे रवींद्र धंगेकर यांनी म्हटले आहे.
