नवी दिल्ली : वृत्तसंस्था
भारत सरकारने कर्करोगाच्या रुग्णांना मोठा दिलासा दिला आहे. कर्करोगाच्या १३७ औषधांच्या किमती कमी करण्यात आल्या आहेत. या नवीन किमती आज ९ नोव्हेंबरपासून लागू करण्यात आल्या. एनपीपीएने या १३७ कर्करोगविरोधी औषधांसाठी व्यापार नफ्याची मर्यादा निश्चित केली. या किमती सुमारे ५० टक्क्यांनी कमी करण्यात आल्या आहेत. ५० हजार रुपये किमतीचे औषध आता फक्त २५ हजार रुपयांना उपलब्ध झाले आहे.
राष्ट्रीय औषध किंमत प्राधिकरणाने दिलेल्या माहितीनुसार आज ९ नोव्हेंबरपासून नवीन किमती लागू करण्यात आल्या. ८५ औषध कंपन्यांनी १३६४ कर्करोगविरोधी औषधांच्या सुधारित किमती जाहीर केल्या. या माहितीनुसार ६७९ ब्रँड्सच्या किमती ५० टक्क्यांहून अधिक कमी करण्यात आल्या आहेत तर काही औषधांच्या किमतीत तब्बल ९६.४५ टक्क्यांची कपात झाली. एका अंदाजानुसार १ लाख रुपये किमतीचे कर्करोगाचे औषध आता फक्त ४ हजार रुपयांना उपलब्ध होईल.
रुग्णांची वार्षिक बचत मोठी
औषधांच्या किमतीतील कपातीमुळे रुग्णांची वार्षिक अंदाजे ३,५४०.३८ कोटींची बचत होण्याचा अंदाज आहे. कमी झालेल्या किमतीत औषधे खरेदी करण्याबाबत जागरूक राहण्यासाठी आणि आपल्या औषधांच्या यादीची तपासणी करण्यासाठी रुग्णांना मार्गदर्शक सूचनाही देण्यात आल्या आहेत. आजपासून रुग्ण ‘फार्मा सही दाम’ अ‍ॅप आणि एनपीपीएच्या वेबसाइटवर नवीन किमती तपासू शकतात.
एनपीपीएची हेल्पलाईन
जास्त किंमत आकारल्यास फार्मा जन समाधान पोर्टलवर किंवा एनपीपीए हेल्पलाइन १८००-१११-२५५ वर तक्रार करता येईल. एनपीपीएच्या या निर्णयामुळे महागडी औषधे खरेदी करण्यास भाग पडलेल्या कर्करोग रुग्णांना मोठा फायदा होईल. सरकारने यापूर्वी अनेक वेळा कर्करोगाच्या औषधांच्या किमती कमी केल्या आहेत.
