अहिल्यानगर : शिर्डी येथे पकडलेल्या भिक्षेकरांना विसापूर कारागृहात हलवण्यात आले होते. त्यातील १३ भिक्षेक-यांना उपचारासाठी जिल्हा रुग्णालयात आणण्यात आले होते. मात्र ते पळून जात असल्याने त्यांना बांधून ठेवण्यात आले होते. यातीलच १३ पैकी ४ भिक्षेकरांचा मृत्यू झाल्याची प्राथमिक माहिती जिल्हा रुग्णालयातून मिळाली आहे.
दरम्यान, जिल्हा रुग्णालयाचे शल्यचिकित्सक डॉ. नागोराव चव्हाण यांनी सांगितले की, दोन भिक्षेक-यांचा मृत्यू झालेला आहे. याबाबत त्यांच्यावर काय उपचार झाले? कोणाचा हलगर्जीपणा होता? याबाबत चौकशी केली जाईल. जिल्हा रुग्णालयाने आतापर्यंत फक्त दोन भिक्षेक-यांचाच मृत्यू झाल्याचे अधिकृतपणे सांगितले असले तरी सद्यस्थितीमध्ये ४ जणांचा मृत्यू झाल्याची माहिती रुग्णालयातील सूत्रांनी दिली.
दरम्यान भिक्षेक-यांना विसापूर कारागृहातून नगरच्या जिल्हा रुग्णालयात आणण्यात आल्यानंतर आम्हाला बांधून ठेवले. अन्न पाणी दिले नाही. उपचारही करण्यात आले नाहीत असे तेथील काही भिक्षेक-यांनी माध्यमांना सांगितले. श्रीराम नवमी निमित्त शिर्डी पोलिसांनी राबवलेल्या मोहिमेमध्ये भिक्षेक-यांना पकडण्यात आले होते. त्यापैकी काही भिक्षेर्कयांना विसापूर येथे रवाना करण्यात आले होते. तेथीलच १३ भिक्षेक-यांना जिल्हा रुग्णालयात पाठवण्यात आले होते.
