मुंबई (प्रतिनिधी) : आदिवासी विकास विभागाने दिव्यांग विद्यार्थ्यांसाठी ५ टक्के आरक्षण देण्याचा निर्णय घेतला आहे. आदिवासी विकास विभागाच्या वसतिगृहांमध्ये आदिवासी विद्यार्थ्यांसाठी दिलेल्या जागांमध्ये आता दिव्यांग विद्यार्थ्यांसाठी ५ टक्के आरक्षण राखण्यात येणार आहे. दिव्यांग व्यक्ती अधिकार अधिनियम २०१६ च्या तरतुदीनुसार हा निर्णय घेतला गेला आहे.
आदिवासी विकास विभागाच्या वतीने गुरूवारी या संदर्भातील शासन निर्णयदेखील काढण्यात आला आहे. या निर्णयामुळे राज्यभरातील आदिवासी विकास विभागाच्या वसतिगृहांमध्ये असलेल्या दिव्यांग विद्यार्थ्यांना अधिक संधी मिळणार आहेत. या निर्णयामुळे आदिवासी विद्यार्थ्यांसाठी असलेल्या शैक्षणिक व निवासस्थळी आरक्षित जागांमध्ये एक न्याय वितरण होईल. यामुळे दिव्यांग विद्यार्थ्यांच्या शैक्षणिक, सामाजिक आणि मानसिक विकासासाठी चांगल्या सुविधा उपलब्ध होतील.
