पुणे/मुंबई : राज्यात १५ मे पर्यंत वरुणराजा धो..धो..बरसणार असून पुढील पाच दिवस कोकण, गोवा, मध्य महाराष्ट्र, मराठवाड्यात १३ व १५ मे रोजी तर विदर्भात १२ मे व १३ मे दरम्यान काही ठिकाणी तुरळक पाऊस पडण्याची शक्यता हवामान खात्याने वर्तवली आहे. १२ ते १३ मे दरम्यान नाशिक, छत्रपती संभाजीनगर येथे तसेच १२ मे रोजी धुळे, नंदुरबार परिसरात मुसळधार पावसाची शक्यता वर्तविण्यात आली आहे.
महाराष्ट्रात यंदा लवकरच मान्सूनच्या आगमनाची शक्यता वर्तवण्यात आली आहे. भारत हवामान विभागाच्या अंदाजानुसार, केरळमध्ये दक्षिण-पश्चिम मान्सून २७ मे २०२५ रोजी पोहोचण्याची शक्यता आहे, जे नेहमीच्या १ जूनच्या तुलनेत पाच दिवस लवकर आहे. केरळमध्ये मान्सून पोहोचल्यानंतर, महाराष्ट्रात मान्सून सामान्यत: ७ ते १० दिवसांत पोहोचतो. त्यामुळे, महाराष्ट्रात मान्सून जूनच्या पहिल्या आठवड्यात ३ ते ६ जून दरम्यान पोहोचण्याची शक्यता आहे. भारत हवामान विभागाच्या अंदाजानुसार, महाराष्ट्रातील विविध भागांमध्ये पुढील पाच दिवसांमध्ये हवामान मोठ्या प्रमाणात बदल होण्याची शक्यता आहे.
राज्यातील बहुतांश भागांमध्ये कमाल तापमान ३५ ते ४० अंशादरम्यान राहण्याची शक्यता आहे. किमान तापमान २५ ते ३० दरम्यान राहण्याची शक्यता आहे. वादळ आणि विजांच्या कडकडाटाच्या वेळी घरात राहा आणि सुरक्षित स्थळी आश्रय घ्यावा. पिकांचे नुकसान टाळण्यासाठी योग्य ती खबरदारी घ्या. हवामानाच्या स्थितीची माहिती घेऊनच प्रवास करा, असे आवाहन देखील प्रशासनाच्या वतीने करण्यात आले आहे.
कोकणात कसा पाऊस?
– कोकण आणि मुंबई परिसरात हलका ते मध्यम पावसाचा अंदाज आहे. मुंबई, ठाणे, पालघर आणि रायगड जिल्ह्यांमध्ये हलका ते मध्यम पाऊस पडण्याची शक्यता आहे. विजांच्या कडकडाटासह वादळ: काही ठिकाणी विजांच्या कडकडाटासह वादळ येण्याची शक्यता आहे.
मध्य महाराष्ट्रात कसा?
– मध्य महाराष्ट्रात पुणे, नाशिक, कोल्हापूर, सातारा या भागांमध्ये हलका ते मध्यम पाऊस पडण्याची शक्यता आहे. तसेच गडगडाटासह वादळ आणि काही ठिकाणी गडगडाटासह वादळ येण्याची शक्यता आहे.
मराठवाड्यात काय परिस्थिती?
– मराठवाड्यातील छत्रपती संभाजीनगर, लातूर, परभणी, नांदेड या भागांमध्ये हलका ते मध्यम पाऊस पडण्याची शक्यता आहे. विजांच्या कडकडाटासह वारा आणि काही ठिकाणी विजांच्या कडकडाटासह वादळ येण्याची शक्यता आहे.
विदर्भात काय?
– विदर्भात नागपूर, अकोला, यवतमाळ, चंद्रपूर या भागांमध्ये हलका ते मध्यम पाऊस पडण्याची शक्यता आहे. आणि विजांच्या कडकडाटासह वादळ तसेच काही ठिकाणी विजांच्या कडकडाटासह वादळ येण्याची शक्यता आहे.
