लातूर : शहरातील राम गल्लीतील एकाचे दुकान फोडून १९ हजारांची चोरी करणा-या पसार आरोपीच्या मुसक्या तब्बल १८ वर्षांनंतर गांधी चौक पोलिस ठाण्याच्या पोलिसांनी कर्नाटक राज्यात मंगळवारी आवळल्या. त्याला कमालनगर (जि. बिदर) येथून उचलण्यात आले आहे.
पोलिसांनी सांगितले, फिर्यादी अभिजित सुधाकरराव माचिले (३०, रा. राम गल्ली, लातूर) यांचे २४ आणि २५ ऑक्टोबर २००७ दरम्यान नटराज टॉकीज कॉम्प्लेक्समधील अलका मॅचिंग, कॉस्मेटीकचे दुकान फोडले होते. यावेळी गल्ल्यातील १९ हजार ५०० रुपये चोरून नेले. याबाबत गांधी चौक ठाण्यात गुरनं. २२५/२००७ कलम ४५७, ३८० भादंविप्रमाणे गुन्हा दाखल करण्यात आला होता.
गुन्हा घडल्यापासून आरोपी पोलिस आणि न्यायालयाला गुंगारा देत होता. तो सतत वास्तव्याचे ठिकाण बदलत पोलिसांना चकवा देत होता. ओमकार जगन्नाथ सोलापुरे (३८, रा. कमालनगर, जि. बिदर, कर्नाटक) हा कमालनगरमध्ये असल्याची माहिती खब-याने पोह. दत्तात्रय शिंदे यांना दिली. मिळालेल्या माहितीच्या आधारे आरोपी ओमकार सोलापुरे याला राहत्या घरातून उचलण्यात आले. त्याच्या मुसक्या आवळत मंगळवारी लातूर न्यायालयासमोर हजर करण्यात आले आहे.
ही कारवाई पोलिस अधीक्षक अमोल तांबे, अपर पोलिस अधीक्षक मंगेश चव्हाण, डीवायएसपी समीरसिंह साळवे यांच्या मार्गदर्शनाखाली पोनि. सुनील रेजितवाड, सफौ. संपत कांदे, पोह. दत्तात्रय शिंदे, पोह. मुकेश सूर्यवंशी यांनी केली आहे.
