नवी दिल्ली : काँग्रेस पक्ष २०२४ च्या लोकसभा निवडणुकीपूर्वी देशवासियांना १३८ रुपये मागत आहे. हो, हे खरे आहे. यासाठी घर-घर अभियान चालविले जाणार आहे. डोनेट फॉर देश नावाने हे अभियान चालवले जाणार आहे. हे अभियान लॉन्च करण्यात आले असून या माध्यमाने काँग्रेस पक्ष लोकांशी जोडला जाईल आणि त्याला निधीही उभारता येणार आहे.
आज काँग्रेसाध्यक्ष मल्लिकार्जुन खर्गे यांनी या अभियानाला सुरुवात करत एक विनोदही केला आणि एकच हशा पिकला. झाले असे की, यावेळी बोलताना अजय माकन म्हणाले, काँग्रेस पक्षाला १३८ वर्षे पूर्ण होत आहेत. मला हे सांगताना अतिशन आनंद होत आहे की, १३८ वर्ष पूर्ण होत असल्याच्या निमित्ताने आज मल्लिकार्जुन खर्गे १ लाख ३८ हजार रुपये डोनेट करत आहेत. हे ऐकताच काँग्रेस कार्यकर्त्यांनी टाळ्यांचा कडकडाट केला.
यावेळी मागे उभ्या असलेल्या के. सी. वेणुगोपाल यांनी हसत हसत गंमतही केली. जयराम देखील त्यांच्याकडेच बघत होते. यावर सर्व हसायला लागले. यानंतर माकन म्हणाले, १३८, १३८० अथवा १३ लाख ८० हजारचे योगदान काँग्रेस पक्षाचे १३८ वर्ष दर्शवतात. माकन म्हणाले, आमच्या सर्व प्रदेशाध्यक्षांना दोन दिवसांपूर्वीच परिपत्रकाद्वारे २८ तारखेपासून घरोघरी जाऊन (एका मतदान केंद्रातील किमान १० घरांना भेटी देऊन) काँग्रेससाठी किमान १३८ रुपयांची मदत मागण्यास सांगितले आहे. यानंतर माकन म्हणाले, मी विनंती करतो की, आमचे दिल्ली प्रदेशाध्यक्ष अरविंदर सिंह लवली यांनी डोनेट आयएनसी डॉट इन प्रक्रियेअंतर्गत खर्गे यांच्या फोनवरून १ लाख ३८ हजार रुपये काँग्रेसला डोनेट करण्याची प्रक्रिया सुरू करावी.
यानंतर लवली आपल्या फोनवर काही तरी करू लागले. त्यांच्या बाजूला खर्गे शांतपणे उभे होते. लवली काही म्हण्यापूर्वीच, काँग्रेसाध्यक्ष खर्गे हसत हसत म्हणाले एक महिन्याचा पगार गेला. हे ऐकूण सर्वच जण खळखळून हसले. यानंतर काही सेकंदांनंतर, खर्गे यांनी पैसे देण्याची प्रक्रिया पूर्ण केली आणि वेणुगोपाल यांनी त्यांना सर्टेफिकीटही दिले.