कळंब नायगाव शिवारातील लॉजवर छापा; दोन महिलांची सुटका, दोघावर गुन्हा
धाराशिव : प्रतिनिधी
कळंब तालुक्यातील नायगाव शिवारात एका लॉजवर वेश्या व्यवसाय सुरु असल्याची माहिती मिळाली. त्यावरुन पोलिसांनी बनावट ग्राहक पाठवून या व्यवसायाचा पर्दाफाश केला. ही कारवाई शिराढोण पोलिसांनी गुरुवारी (दि.११) सायंकाळी ६ वाजण्याच्या सुमारास केली. या कारवाईत दोन महिलांची सुटका करण्यात आली असून दोघावर गुन्हा दाखल करण्यात आला आहे.
याबाबत माहिती अशी की, शिराढोण पोलीस ठाणेचे सहाय्यक पोलीस निरीक्षक श्री. कोळेकर यांच्या पथकाने शिराढोण पोलीस ठाणे हद्दीतील अवैध धंद्यांविषयी माहिती काढुन कायदेशीर कारवाई करण्यासाठी गुरुवारी (दि.११) गस्तीस होते. गस्ती दरम्यान पथकास गुप्त बातमीदारामार्फत माहिती मिळाली की, नायगाव शिवारातील नायगाव ते मुरुडकडे जाणारे रोडवर रॉयल लॉज येथे हॉटेलमध्ये काही महिलांद्वारे वेश्या व्यवसाय करवुन घेत आहेत. यावर पथकाने एका बनावट ग्राहकास तेथे पाठवून बातमीची खात्री करुन त्या लॉजवर सायंकाळी ६.१६ वाजण्याच्या सुमारास छापा टाकला. यावेळी लॉजमध्ये दोन महिला आढळुन आल्याने महिला पोलीसांमार्फत त्यांची विचारपुस केली असता आरोपी अक्षय दादासाहेब घोगरे, लॉज मॅनेजर अजय अच्युत रसाळ, दोघे रा. मुरुड ता. जि. लातूर यांचे सांगण्यावरुन त्या महिलांना वाणिज्यिक प्रयोजनाकरीता आश्रय देउन त्यांना लैंगीक स्वैराचाराकरीता परावृत्त करत होते. व आरोपी दोघेजण त्यावर स्वत:ची उपजिवीका करत आहेत असे समजले.
यावरुन पथकाने आरोपींना ताब्यात घेउन त्यांच्या ताब्यातील मोबाईल फोन, नोंदीचे रजिस्टर, रोख ५ हजार ३०० रुपये व निरोधची पाकीट असा एकुण १५ हजार ४२० रुपयांचा मुद्देमाल हस्तगत केला. पोलीसांनी संबंधीत वेश्या व्यवसाय करणा-या लॉजवरील त्या महिलांची सुटका करुन आरोपी अक्षय दादासाहेब घोगरे, लॉज मॅनेजर अजय अच्युत रसाळ, यांचेविरुध्द गुरनं १४१/२०२६ बी.एन.एस सह १४३, १४४(२), ३ (५) सह कलम ३, ४, ५, ६ मानवी अनैतिक व्यवसाय प्रतिबंधक अधिनियम अन्वये गुन्हा नोंदवला आहे.
