नवी दिल्ली : निवडणूक आयोग (ईसी) पुढील आठवड्यात आंध्र प्रदेश आणि तामिळनाडूच्या भेटीसह लोकसभा निवडणुकीसाठी राज्यांच्या तयारीचा आढावा घेणार आहे. निवडणूक आयोग ७ जानेवारीपासून राज्यांच्या दौऱ्यावर असणार आहे. मुख्य निवडणूक आयुक्त राजीव कुमार यांच्या नेतृत्वाखाली आयोगाचे अधिकारी ७ ते १० जानेवारी दरम्यान आंध्र प्रदेश आणि तामिळनाडूमध्ये असतील. मुख्य निवडणूक आयुक्तांसह, निवडणूक आयुक्त अनुप चंद्र पांडे आणि अरुण गोयल देखील असतील.
दौऱ्यापूर्वी उपनिवडणूक आयुक्त ६ जानेवारी रोजी आयोगाला दोन्ही राज्यांतील तयारीची माहिती देतील. लोकसभा निवडणुकीच्या तयारीवर लक्ष ठेवण्यासाठी उपनिवडणूक आयुक्तांनी जवळपास सर्वच राज्यांना भेटी दिल्या आहेत. निवडणूक आयोगाने विधानसभा किंवा लोकसभा निवडणुकीपूर्वी राज्यांना भेटी देऊन राजकीय पक्ष, वरिष्ठ पोलीस आणि प्रशासकीय अधिकारी आणि तळागाळातील निवडणूक यंत्रणांची भेट घेणे सामान्य आहे.
निवडणूक आयोग सर्व राज्ये आणि केंद्रशासित प्रदेशांना भेट देईल की नाही हे अद्याप निश्चित नाही. ज्या राज्यांमध्ये नुकत्याच विधानसभा निवडणुका झाल्या त्या राज्यांना आयोग भेट देऊ शकत नाही. तसेच २०१९ मधील लोकसभा निवडणुका १० मार्च रोजी जाहीर करण्यात आल्या होत्या आणि ११ एप्रिल ते १९ मे या सात टप्प्यांत पार पडल्या. २३ मे रोजी मतमोजणी पार पडली.
