छत्रपती संभाजीनगर : प्रतिनिधी
छत्रपती संभाजीनगरमध्ये वाळूज परिसरात एकाच कुटुंबातील तिघांचा डोंगरावरून पडून मृत्यू झाला. आत्महत्या करणा-या मुलाला वाचवायला गेलेल्या वडिलांचा तोल गेल्याने डोंगरावरून पडून मृत्यू झाला. तर मुलगा आणि पतीला डोंगरावरून पडताना बघून आईनेही उडी मारली. या घटनेने संभाजीनगरात शोककळा पसरली आहे.
शुक्रवारी सकाळी एक तरुण आत्महत्या करण्यासाठी वाळूज परिसरातील खवड्या डोंगरावर पोहोचला होता. त्याची समजूत काढण्यासाठी आई-वडीलही तिथे पोहोचले. या घटनेची माहिती मिळताच पोलिसांचे पथकही घटनास्थळी पोहोचले होते. पोलिस कर्मचारी आणि आई-वडील त्या मुलाची समजूत काढण्याचा प्रयत्न करत होते. डोंगराच्या कडेला तो मुलगा थांबल्याने समजूत काढण्यापलीकडे इतर पर्याय नव्हता.
काही वेळाने त्या तरुणाने डोंगरावरून उडी मारली. यादरम्यान त्याला वाचवायला गेलेल्या वडिलांचाही तोल गेला आणि दोघेही डोंगरावरून खाली पडले. मुलगा आणि पती डोंगरावरून पडल्याचे बघून आईनेही डोंगरावरून उडी मारली. या हृदयद्रावक घटनेने परिसरात हळहळ व्यक्त होत आहे. कुणाल मुरलीधर चांदवडे (मुलगा, १८ वर्षे), मुरलीधर चांदवडे (वडील), संगीता चांदवडे (आई) अशी या मृतांची नावे असून प्राथमिक अंदाजानुसार कुणाल हा नैराश्यात होता, असे समजते. घरगुती कारणावरूनच ही घटना घडल्याचा अंदाज आहे.
