मुंबई : प्रतिनिधी
राज्य सरकारकडून महिलांना आर्थिक आधार देण्यासाठी ‘मुख्यमंत्री माझी लाडकी बहीण’ योजना राबवली जात आहे. या योजनेंतर्गत पात्र लाभार्थी महिलांच्या बँक खात्यात दरमहा १,५०० रुपये जमा केले जातात. मात्र, सप्टेंबर महिन्याचा हप्ता अद्याप जमा न झाल्याने महिलांमध्ये प्रतीक्षा वाढली आहे. नवरात्रोत्सव आणि दसरा संपल्यानंतरही पैसे खात्यात न आल्याने आता हा हप्ता कधी मिळणार, असा प्रश्न लाभार्थी महिलांकडून उपस्थित केला जात आहे.
‘ लाडकी बहीण’ योजनेच्या सप्टेंबर महिन्याच्या हप्त्याबाबत अद्याप सरकारकडून कोणतीही अधिकृत घोषणा करण्यात आलेली नाही. मात्र, २५ ऑक्टोबरनंतर लाभार्थी महिलांच्या खात्यात पैसे जमा होऊ शकतात, असा अंदाज व्यक्त केला जात आहे. दस-यानंतर होणा-या मंत्रिमंडळाच्या बैठकीत हप्त्याबाबत चर्चा होऊन निर्णय घेतला जाण्याची शक्यता वर्तवली जात आहे. तथापि, हप्ता जमा होण्याची निश्चित तारीख अद्याप जाहीर झालेली नाही.
सप्टेंबर महिन्याचा हप्ता रखडल्यामुळे आता ऑक्टोबर महिन्याचे पैसेही एकत्र मिळणार का, याबाबत चर्चा सुरू झाली आहे. सप्टेंबर आणि ऑक्टोबर या दोन महिन्यांचे मिळून एकूण ३,००० रुपये खात्यात जमा होण्याची अपेक्षा काही लाभार्थी महिला व्यक्त करत आहेत.
सणासुदीच्या काळात यापूर्वी काही वेळा हप्ते लवकर किंवा एकत्र दिले गेल्याने यंदाही सरकारकडून असा निर्णय घेतला जाईल का, याकडे महिलांचे लक्ष लागले आहे. मात्र, दोन्ही महिन्यांचे हप्ते एकत्र देण्याबाबत अद्याप कोणताही अधिकृत निर्णय जाहीर झालेला नाही. त्यामुळे ३,००० रुपये एकाच वेळी मिळतील, असे सध्या निश्चितपणे सांगता येणार नाही.
आता ऑक्टोबर महिना संपण्यासाठी काही दिवस शिल्लक असताना सप्टेंबरचा हप्ता कधी जमा होणार आणि ऑक्टोबरचे पैसेही त्यासोबत मिळणार का, याबाबत उत्सुकता आहे. सरकारकडून अधिकृत घोषणा होईपर्यंत लाभार्थी महिलांना हप्त्याच्या तारखेसाठी प्रतीक्षा करावी लागणार आहे.
लाभार्थी महिलांचे सरकारच्या निर्णयाकडे लक्ष
मुख्यमंत्री माझी लाडकी बहीण योजनेच्या माध्यमातून पात्र महिलांना दरमहा १,५०० रुपयांची आर्थिक मदत दिली जाते. घरखर्च, दैनंदिन गरजा आणि सणासुदीच्या खरेदीसाठी या रकमेचा महिलांना उपयोग होतो. त्यामुळे सप्टेंबरचा हप्ता रखडल्याने लाभार्थी महिलांमध्ये प्रतीक्षा वाढली आहे.
