लातूर : प्रतिनिधी
लातूर शहरातून २०५ डेंग्यु संशयीत रुग्णांचे रक्तजल नमुने सेंन्टीनल लॅब, नांदेड येथे तपासणीसाठी पाठविले असता अद्यापपर्यंत एकुण २१ रुग्णांची रक्तजल नमुने डेंग्यु आजाराकरीता पॉझिटीव्ह आले आहेत. त्यामुळे शहरातील डेंग्यु संशयीत रुग्णाची वाढती संख्या लक्षात घेवून शहरामध्ये डेंग्यु प्रतिबंधात्मक उपाययोजनांची अंमलबजावणी करण्यासाठी दि. १८ ते २८ जनू या कालावधीमध्ये संपूर्ण शहरात अबेट मोहीमेचा दुसरा राउंड राबविण्यात येत आहे.
मनपा आयुक्त्त बाबासाहेब मनोहरे, उपायुक्त डॉ. पंजाब खानसोळे यांच्या मार्गदर्शनानुसार डेंग्यु ताप प्रतिबंधात्मक उपाययोजनाच्या अनुषंगाने लातूर शहर महानगरपालिकेमार्फत माहे मे-२०२४ अखेर ऍबेट मोहिमेचा पहिला राऊंड शहरामध्ये राबविण्यात आला होता. सदर मोहिमेमध्ये शहरातील एकुण ८१,८०६ घरांना आरोग्य कर्मचा-यांमार्फत भेटी देवून करण्यात आलेल्या किटश शास्त्रीय सर्वेक्षणात ४,२१६ घरांमध्ये डास आळी दुषित पाणीसाठे आढळून आले, दुषित पाणीसाठे नष्ट करण्यात आले आणि उर्वरित पाणीसाठ्यामध्ये अॅबेट औषध टाकून संबंधीतांना डेंग्यु प्रतिबंधात्मक उपाययोजनाविषयी आरोग्य शिक्षण देण्यात आले.
आठवड्यातून एकदा हे नक्की करा. घराभोवती ज्या मध्ये पावसाचे पाणी साचू शकेल अशा निरुपयोगी वस्तू ठेवू नये, त्या नष्ट कराव्यात. कुलदाणी, कुंडी मनीप्लान्ट इत्यादीतील पाणी नियमित बदलावे. परिसरातील डबकी वाहती करावी. नाले स्वच्छ करावेत. ड्रम किंवा इतर पाण्याची भांडी पुर्णपणे रिकामी करावीत. स्वच्छ धुतल्या नंतर भरून झाकण लावावे. तरी या मोहिमेत एकूण ८ नागरी आरोग्य केंद्रातील कर्मचारी आणि आशा स्वयंसेविका यांचे मार्फत राबविण्यात येत आहे. तरी अॅबेट मोहिमेत घर भेटीस येणा-या आरोग्या कर्मचा-यास सहकार्य करावे असे आवाहन मनपा आरोग्याधिकारी डॉ. शंकर भारती यांच्या वतीने करण्यात येत आहे.