नाशिक : प्रतिनिधी
नाशिकमध्ये भीषण अपघात झाल्याची माहिती समोर आली आहे. राज्य परिवहन बस आणि कार यांच्यात जोराची धडक झाली. या धडकेत वाहनांना भीषण आग लागून यात दोन जणांचा होरपळून मृत्यू झाल्याचे सांगण्यात येत आहे. या अपघाताबाबत पोलिसांनी माहिती दिली. नाशिक-कळवण रस्त्यावर हा अपघात झाला त्यावेळी कारमध्ये पाच जण प्रवास करत होते.
धडकेमुळे बस आणि कारला आग लागली. या आगीत कारमधील पाच प्रवाशांपैकी दोघे होरपळले गेले. तर तीन जणांना पोलिस कर्मचा-यांनी व इतरांनी सुखरूप बाहेर काढले. बसमधील सर्व प्रवासी सुरक्षित आहेत. मृतांची ओळख अद्याप पटलेली नसल्याचे त्यांनी सांगितले. याप्रकरणी दिंडोरी पोलिस ठाण्यात गुन्हा दाखल करण्यात आला असून पुढील तपास सुरू असल्याचे अधिका-याने सांगितले.
