छ. संभाजीनगर : समृद्धी महामार्गावरील अपघाताची मालिका काही केल्या थांबायचे नाव घेत नाही. आज पुन्हा एकदा समृद्धी महामार्गावर भीषण अपघात झाला आहे. वाशिमच्या कारंजा तालुक्यातील लोहारा गावच्या हद्दीत ट्रकला ओव्हरटेक करण्याच्या नादात अपघात झाला. कारवरील नियंत्रण सुटून कार डिव्हायडरला धडकून अपघात झाला.
या अपघातात एक महिला ठार झाली असून दोन जण किरकोळ जखमी झाले आहेत. कार डिव्हायडरला धडकल्याने कारमध्ये शॉर्ट सर्किट होऊन आग लागली आहे. या आगीत कार पूर्णपणे जळून खाक झाली आहे.
नागपूरवरून मुंबईकडे जात असताना वाशिमच्या कारंजा तालुक्यातील लोहारा गावच्या हद्दीत चॅनल क्रमांक २०० मुंबई कॉरिडोरवर ओव्हरटेक करण्याच्या नादात कारवरील नियंत्रण सुटले. कार थेट डिव्हायडरला धडकली, धडक देताच कार चालवणारी महिला कारमधून बाहेर फेकल्या गेल्याने तिचा जागीच मृत्यू झाला. धडक इतकी जबरदस्त होती की कारमध्ये शॉर्टसर्किट होऊन कारने लगेच पेट घेतला. हा अपघात पहाटे साडेतीन वाजता घडल्याची माहिती आहे.
