अहमदाबाद : गुजरात पोलिसांनी गुरुवारी सांगितले की, संशयास्पदरित्या भेसळयुक्त आयुर्वेदिक औषध प्यायल्याने गेल्या दोन दिवसांत किमान पाच जणांचा मृत्यू झाला आहे. यासोबतच दोघांना रुग्णालयात दाखल करण्यात आले आहे. खेडा जिल्ह्यातील एका दुकानदाराने काळमेघसाव-अश्वरिष्ठ नावाचे आयुर्वेदिक औषध सुमारे पन्नास जणांना विकल्याचे प्राथमिक तपासात निष्पन्न झाल्याचे पोलिसांनी सांगितले आहे.
हे प्रकरण नडियाद नावाच्या गावातील आहे. खेडाचे पोलीस अधीक्षक राजेश गढिया यांनी माध्यमांना सांगितले की, एका गावकऱ्याच्या रक्त तपासणीत या सिरपमध्ये मिथाईल अल्कोहोल मिसळल्याचे स्पष्ट झाले आहे. ते म्हणाले, गेल्या दोन दिवसांत सरबत प्यायल्याने पाच जणांचा मृत्यू झाला आहे. दोघांवर उपचार सुरू आहेत. आम्ही एका दुकानदारासह तिघांना ताब्यात घेतले आहे, जेणेकरून त्यांची चौकशी करता येईल. मिथाइल अल्कोहोल हा एक विषारी पदार्थ आहे.
