मुंबई : प्रतिनिधी
सैफ अली खानवर हल्ला करणारा आरोपी मोहम्मद शरीफुल इस्लाम (३०) हा पोलिसांपासून वाचण्यासाठी झुडपात लपून बसला होता. पोलिसांनी पकडल्यावर तो घाबरला होता. चौकशीदरम्यान त्याने गुन्हा कबूल केला आहे, असे एका पोलिस अधिका-याने सांगितले. याप्रकरणी मुंबई पोलिसांनी तयार केलेल्या शंभर पोलिसांच्या पथकात हा अधिकारी सहभागी होता.
इस्लामने गुरुवारी पहाटे बॉलिवूड अभिनेता सैफ अली खान याच्यावर हल्ला केला. त्यानंतर सुमारे ७० तासांनी आरोपीला अटक करण्यात पोलिसांना यश मिळाले आहे. त्यासाठी शंभर पोलिस कार्यरत होते. पोलिस जवळ पोहोचत आहेत याची जाणीव होताच हल्लेखोर घाबरला आणि झाडाझुडपांत लपला.
परंतु शेवटी त्याला पकडण्यात आले. त्यानंतर त्याला पोलिसांनी विचारले असता सैफवर हल्ला केल्याचे त्याने कबूल केले. सध्या त्याची खार पोलिस ठाण्यात चौकशी सुरू असून दुपारी त्याला वांद्रे महानगर दंडाधिकारी न्यायालयात हजर करण्यात येणार आहे. आरोपी काही काळ तुरुंगात होता, अशी माहितीही पोलिसांना मिळाली आहे. चोरीच्या प्रकरणात तो किती काळ कारागृहात होता, ही माहिती पोलिस तपासत आहेत.
आरोपीला ठाण्यातील कासारवडीवली पोलिस ठाण्याच्या हद्दीतून रविवारी पहाटे अटक करण्यात आली आहे. तेथे आरोपी हिरानंदानी इस्टेट येथील झाडीत लपून पसला होता. अखेर त्याला ताब्यात घेऊन वांद्रे येथे आणण्यात आले. त्याला सुरुवातीला चेंबूर पोलिस ठाण्यात व त्यानंतर खार पोलिस ठाण्यात ठेवण्यात आले आहे. त्याला वैद्यकीय चाचणीनंतर न्यायालयापुढे हजर करण्यात येईल असे अधिका-याने सांगितले. याप्रकरणी वांद्रे पोलिस याप्रकरणी पुढील तपास करणार आहेत. ते आरोपीच्या कोठडीसाठी न्यायालयापुढे मागणी करतील.
आरोपी शहजाद बांगलादेशी घुसखोर
आरोपी शहजाद हा बांगलादेशी घुसखोर असल्याचे निष्पन्न झाले आहे. बांगलादेशातून मुंबईत तो आला होता. मुंबईत त्याच्यासोबत राहणा-या दोघांची शनिवारी गुन्हे शाखेने चौकशी केल्याचे सूत्रांनी सांगितले. आरोपी मुंबईत हाऊस कीपिंग एजन्सीमध्ये कामाला होता. आरोपीकडे कोणतीही अधिकृत कागदपत्रे नसल्यामुळे त्याच्याविरोधात पारपत्र कायदा व परकीय नागरिक कायद्याअंतर्गत कलमांची वाढ करण्यात आली आहे. आरोपी पूर्वी ठाण्यातील हॉटेलमध्ये कामाला होता.
