बुलडाणा : प्रतिनिधी
बुलडाण्यातील एका नवजात बाळाच्या पोटात दोन अर्भके आढळून आली होती. या अर्भकांना ‘फिट्स इन फिटो’ असे म्हणतात. अमरावतीतील रुग्णालयात यशस्वी शस्त्रक्रिया करून ही अर्भके काढण्यात आली. डॉक्टरांनी हे आव्हानपूर्ण ऑपरेशन पार पाडले आणि बाळ आणि आई दोघेही सुरक्षित आहेत.
दरम्यान, बुलडाण्यात एक विचित्र घटना घडली होती. एका महिलेच्या पोटात असलेल्या बाळाच्या पोटात अर्भक असल्याचे आढळून आले होते. आज या बाळावर यशस्वी शस्त्रक्रिया करण्यात आली. या बाळाच्या पोटात एक अर्भक असल्याचे डॉक्टरांनाही वाटले होते. पण ऑपरेशन करताना या बाळाच्या पोटात एक नव्हे तर चक्क दोन अर्भकं निघाली. डॉक्टरांनी यशस्वी शस्त्रक्रिया करून ही दोन्ही अर्भके काढली आहेत. मात्र, पहिल्यांदाच असा प्रकार घडल्याने डॉक्टरही हैराण झाले आहेत. ही महिला आणि बाळ दोन्ही सुखरूप असल्याचे सांगण्यात आले आहे.
बुलडाण्यातील तीन दिवसांच्या नवजात बाळावर आज अमरावतीच्या विभागीय संदर्भ सेवा रुग्णालयात यशस्वी शस्त्रक्रिया करण्यात आली. या बाळाच्या पोटात एक नव्हे तर दोन अर्भकं निघाली. ही दोन्ही अर्भके तीन इंचाची होती. विशेष म्हणजे या बाळाच्या पोटातील दोन्ही अर्भकांनी मानवी आकार घेतला होता. शरीर तयार झाले होते. ५ डॉक्टर, ४ नर्स आणि इतर कर्मचारी अशा १२ जणांचा स्टाफ ऑपरेशनच्या तयारीला लागला होता. डॉक्टरांच्या अथक प्रयत्नामुळे या बाळावर यशस्वी शस्त्रक्रिया करून दोन्ही अर्भके काढण्यात आली आहेत.
पाच लाखांत एखादी घटना
५ लाख मुलांमधून एखाद्या मुलामध्ये असा प्रकार आढळून येतो. या प्रकाराला वैद्यकीय भाषेत ‘फिट्स इन फिटो’ म्हणतात. बाळाचे वजन २ किलो २२५ ग्रॅम इतके असून, केवळ बाळालाच विभागीय संदर्भ सेवा रुग्णालयात दाखल करण्यात आले होते. अमरावतीच्या सुपर स्पेशालिटी हॉस्पिटलमध्ये आज सकाळी ११ वाजता या चार दिवसांच्या बाळावर शस्त्रक्रिया पार पडली.
