नवी दिल्ली : वृत्तसंस्था
सध्या कृत्रिम बुद्धिमत्ता तंत्रज्ञानाचा मुक्त वापर होत आहे. शाळा-महाविद्यालयातील तरुणांपासून ते सरकारी कर्मचा-यांपर्यंत त्याचा वापर वाढला आहे. अनेक प्रकल्पासाठी एआय अ‍ॅपचा वापर वाढला आहे. चॅट जीपीटी, डिपसिक या प्लॅटफॉर्मचा वापर वाढला आहे. मात्र मोदी सरकारने एआयचा वापर करणा-या कर्मचा-यांसाठी अलर्ट जाहीर केला आहे. वित्त मंत्रालयाने सरकारी कार्यालयातील लॅपटॉप, पीसी अथवा शासकीय इलेक्ट्रॉनिक गॅझेटमध्ये कोणत्याही एआय अ‍ॅपचा वापर न करण्याचे निर्देश दिले आहेत. त्यामुळे गोपनिय माहिती आणि डाटा चोरीचा धोका असल्याचे मोदी सरकारने स्पष्ट केले आहे.
सध्या भारतात चॅट जीपीटी आणि डीपसिक गुगल जेमिनी या एआय अ‍ॅप्सचा वापर होतो. याशिवाय इतर पण अनेक एआय अ‍ॅप्स आहेत. काम सोपे होण्यासाठी त्यांचा वापर होतो. वेळेची बचत होते आणि झटपट काम होते, म्हणून त्यांचा सर्रास वापर होत आहे. पण हे एआय अ‍ॅप पहिल्यांदा वापर करताना डेटा परवानगी घेतात. त्यांना सर्व अ‍ॅक्सेस मिळाल्यावर संबंधित लॅपटॉप, पीसी, मोबाईलची हेरगिरी होण्याची भीती असते. त्यामुळे मोदी सरकारने तातडीने हा निर्णय घेतला आहे.
एआय अ‍ॅप्स आणि एआय चॅटबोटच्या मदतीने अनेक लोक प्रोम्प्ट देऊन पत्र, लेख तयार करणे अथवा भाषांतर करतात. अनेक सरकारी कर्मचारी या एआय अ‍ॅपच्या मदतीने सादरीकरण, प्रेझेंटेशन करतात. त्यासाठी फार कष्ट पडत नाहीत. केवळ एक टेक्स्ट प्रोम्ट करून हे काम करता येते.
डिपसिक ठरले लोकप्रिय
चीनचे स्मार्टअ‍ॅप डिपसिक सध्या लोकप्रिय ठरले आहे. या स्टार्टअपने किफायतशीर दरात सेवा उपलब्ध करुन दिल्याने एकच खळबळ उडाली आहे. चीनचे हे स्टार्टअप अ‍ॅप जवळपास २० महिने अगोदर सुरू झाले होते. २० जानेवारी २०२५ रोजी डीपसीक आर१ चॅटबोटच्या वापरात अचानक तेजी आली. त्याने अनेक एआय कंपन्यांची झोप उडविली आहे. अमेरिकेत डिपसिक विरोधात लवकरच मोठी कारवाई पाहायला मिळाल्यास वावगे ठरू नये. भारताचे पण लवकरच स्वत:चे एआय अ‍ॅप येणार आहे.
