मुंबई : राज्यातील महिलांना आणि ज्येष्ठांना विविध सवलती दिल्यामुळे एसटी तोट्यात आल्याचे वक्तव्य परिवहन मंत्री प्रताप सरनाईक यांनी गुरूवार दि. २० फेब्रुवारी रोजी धाराशिव येथे केले होते.
यावरून आता विरोधक आक्रमक झाले असून तत्कालीन मुख्यमंत्री एकनाथ शिंदे यांच्याच महिलांना एसटी प्रवासात ५० टक्के सवलत देण्याचा निर्णय आता रद्द करण्यात येणार असल्याचे स्पष्ट दिसून येत असल्याने यापूढे लाडकी बहिणी योजना लाभार्थी असलेल्या महिलांना एसटी बसमध्ये पुर्ण तिकीट काढावे लागणार असल्याचे सुत्राचे म्हणणे आहे.
ज्येष्ठ नागरिक आणि महिलांना सवलती दिल्यामुळेच एसटी तोट्यात गेल्याचे राज्य सरकार मान्य करत नव्हते. मात्र, आता परिवहन मंत्री प्रताप सरनाईक यांनीच एकप्रकारे या योजनांमुळे एसटी तोट्यात गेल्याचे कबुल केले आहे. मागील सरकारने महिला आणि जेष्ठांसाठी विविध योजना लागू केल्या होत्या. यामध्ये एसटीच्या प्रवासात महिलांना ५० टक्के सवलत देण्यात आली होती. शिवाय जेष्ठांसाठी देखील विविध सवलती देण्यात आल्या होत्या. मात्र, या सर्व सवलतीमुळे एसटीला दररोज ३ कोटींचा तोटा होत असल्यामुळे यापुढे एसटीमध्ये कोणतीही नवी सवलत दिली जाणार नसल्याचे सरनाईक यांनी स्पष्ट केले.
दरदिवशी ३ कोटींचा तोटा
महिलांना आणि ज्येष्ठ नागरिकांना देण्यात आलेल्या सवलतींमुळे एसटीला दर दिवशी ३ कोटी रुपयांचा तोटा होतोय. त्यामुळे यापुढे एसटीमध्ये कोणतीच सवलत दिली जाणार नाही. लाडक्या बहिणींना बसमध्ये ५०% सवलत ज्येष्ठ नागरिकांना मोफत बस या सवलतीमुळे परिस्थिती अशी झाली आहे. अशा सवलती सर्वांना देत बसलो तर महामंडळ चालवणे कठीण होईल असे सरनाईक म्हणाले.
